DILI, 07 agostu 2024 (TATOLI) – Xefe Departamentu Maternidade iha Hospitál Nasionál Guido Valadares (HNGV), Zinia Mascarenhas, hateten HNGV iha departamentu maternidade rejista kazu bebé hamutuk 142 mak mate iha inan nia kabun laran.
“Husi janeiru to’o juñu 2024, totál bebé ne’ebé mate iha kanotak no durante partu iha HNGV hamutuk 142, bebé hirak ne’e la mate iha HNGV, maibé mate iha inan nia kabun laran ka iha uma no iha mós kazu seluk ne’ebé afeta, ne’ebé mak transfere husi postu saúde, sentru saúde iha munisípiu mai HNGV”, Xefe Departamentu, Zinia Mascarenhas ba jornalista sira iha HNGV Bidau, Dili.
Nia esplika, bebé sira ne’ebé mate iha inan nia kabun laran, la’ós hothotu mai partu iha HNGV, maibé hetan transferénsia husi sentru saúde sira ne’ebé iha munisípiu no área rurál sira, tanba ne’e aumenta númeru bebé mate iha HNGV.
“Bebé mate iha inan nia kabun laran ne’e kauza husi inan sira ne’ebé durante isin rua, la hakbesik ba Sentru Saúde hodi halo ezame, inan isin rua sira ne’ebé hela iha área rurál, ne’ebé la hakbesik liu ba Sentru Saúde Komunitária, nune’e ida-ne’e mak bele fó impaktu ba inan sira no ba bebé nia kondisaun”, nia subliña.
Ba bebé sira ne’ebé moris ho todan menus husi grama 2500, sira kategoriza hanesan bebé prematura, iha grama 2,997 mak moris iha HNGV, enkuantu iha bebé grama 3,680 ne’ebé moris ho todan liu 2500 grama.
“Kompara ho tinan kotuk, tinan ida-ne’e, númeru bebé ne’ebé mate aas liu kompara ho tinan kotuk, iha fulan neen nia laran, ita rejista ona pasiente internadu hamutuk 3.594, ba tinan 2023, totál pasiente husi janeiru to’o dezembru hamutuk 1.919 pasiente ne’ebé tama iha ospitál”, nia hateten.
Ba rekursu umanu iha departamentu maternidade, iha médiku espesialista na’in-hitu, iha espesialista na’in-haat husi Timor-Leste, médiku espesialista na’in-rua husi Cuba no na’in -ida husi Xina. Pesoál médiku jerál hamutuk 16, parteira permanente hamutuk 40 no parteira kontratadu hamutuk 30.
Tuir dadus, husi janeiru to’o juñu 2024, totál pasiente inan ne’ebé halo internamentu iha maternidade hamutuk 3.594. Husi ne’e, bebé ne’ebé moris hamutuk 3.508; partu normál 2.391, partus sezariana 927, partus ventoza 281.
Jornalista : Felicidade Ximenes
Editór : Zezito Silva
