DILI, 07 Agostu 2024 (TATOLI) – Governu Timor-Leste sei rejista Parke Nasionál Nino Konis Santa hanesan rezeva biosfera iha ámbitu Programa Man and Biosphere (MAB) Organizasaun Nasaun Unida ba Edukasaun, Siénsia no Kultura (UNESCO) iha Paris, ho objetivu atu hadi’ak parke nia estadu konservasaun no insentiva envolvimentu komunidade iha salvaguadra biodiversidade nian.
Ba asuntu ne’e, Ministériu Agrikultura, Pekuária, Peska no Floresta (MAPPF), parseria ho UNESCO Jakarta, organiza semináriu nasionál ida ho tema “Nomeasaun Parke Nasionál Nino Konis Santana hanesan Sítiu Dezignadu UNESCO no Planu Asaun ba Prezervasaun”.
Ministru Agrikultura, Pekuária, Peska no Floresta, Marcos da Cruz, hateten Parke Nasionál Nino Konis Santana hanesan sentru biodiversidade, tanba ne’e rejista parke ne’e iha UNESCO hanesan Patrimóniu Mundiál.
“Atu hetan estatutu ne’e, la’ós atu kontribui de’it ba valór ekológiku no kulturál, maibé sei intensifika esforsu Governu Timor-Leste nian ba konservasaun no dezenvolvimentu sustentavel”, governante informa iha Salaun Nobre Ministériu Negósiu Estranjeiru no Kooperasaun, iha Praia dos Coqueiros, ohin.
Marcos da Cruz adianta katak parke ne’e hanesan sentru biodiversidade, ne’ebé abriga variedade espésie, ne’ebé barak liu tama iha perigu estinsaun. “Abitat oioin iha parke apoia tipu vejetasaun úniku, dezde husi mangál kosteira to’o floresta tropikál no ekosistema oioin. Parke ne’e abitat ba espésie animál oioin, liuliu ba konservasaun manu sira, fatin ba populasaun espésie amesada atu lakon, hanesan rusa Timór no rekursu mariñu oioin”, afirma.
Iha sorin seluk, Diretór-Ezekutivu Komisaun Nasionál ba UNESCO Timor-Leste (KNTLU), Luís Soares, informa semináriu ne’e ho objetivu atu kria komisaun nasionál ida ne’ebé envolve liña ministeriál sira atu realiza diskusaun no koordenasaun téknika hodi kompleta rekizitu sira aprezenta husi UNESCO, antes Governu submete formalmente nia kandidatura hanesan Patrimóniu Mundiál iha kategoria Man and Biosphere, ne’ebé prevista iha Setembru tinan ne’e, iha Paris.
“UNESCO aprezenta rekizitu oioin mak hanesan ezije Timor-Leste halo levantamentu demografia, prodús dokumentáriu iha vídeo no fotografia atu deskreve istória, disemina informasaun ba komunidade lokál, nomós aloka orsamentu atu garante sustentabilidade ba nia prezervasaun, antes Governu submete dokumentu ho formalmente”, dehan.
Luís Soares salienta katak Timor-Leste presiza kompleta rekizitu antes 30 Setembru tinan ne’e no se la kumpre kritéria ba submisaun dokumentu maka bele adia ba 2025.
Marka prezensa iha eventu, Koordenadora Rezidente ONU iha Timor-Leste, Olufunmilayo Balogun-Alexander, reprezentante UNESCO Jacarta, Ryuichi Fukuhara, Sekretáriu Estadu Floresta, Fernandino Vieira no seluk tan.
Parke Nasionál Nino Konis Santana ho nia luan hamutuk ektare rihun 129 ne’e UNESCO nomeia ona hanesan patrimóniu mundiál iha 2014.
Jornalista: Tomé Amado
Editora: Maria Auxiliadora
