DILI, 08 agostu 2024 (TATOLI)—Reprezentante povu iha uma fukun Parlamentu Nasionál (PN) liuhusi Deputadu CNRT, Duarte Nunes, husu Autoridade Inspesaun Fiskalizasaun Ekonomia no Sanitária Institutu Públiku (AIFAESA, I.P) atu kontrola másimu sasán liu prazu iha estabelesimentu komersiál sira.
“Persiza haree sasan sira-ne’ebé ita importa, tanba ita-nia konsumidór sira-né’e bele hetan impaktu,” nia hateten ba jornalista sira iha resintu Parlamentu, kinta ne’e.
Aleinde ne’e, membru husi órgaun lejislativu ne’e husu ba Ministériu Saude (MS) presiza haree ai-moruk sira-ne’ebé liu ona prazu tanba bainhira la haree ho didi’ak sei afeta ba pasiente sira-nia moris.
Haree ba preokupasaun husi komsumidór sira ba sasán liu prazu, nu’udar Deputadu husi Bankada Governu rejista hodi hala’o komunikasaun ho parte ezekutivu atu bele solusiona.
Nia mós rekomenda ba MS atu halo teste ai-moruk sira-ne’ebé liu ona prazu iha laboratóriu no foti sampel ba rai-li’ur hodi halo teste atu bele hatene.
Aleinde ne’e, nia rekomenda ba AIFAESA, I.P iha futuru presiza iha ona laboratóriu rasik hodi halo teste ba produtu no ai-moruk ne’ebé liu ona prazu.
Antes ne’e mós Deputada CNRT, Aliança Araújo ho Deputada PLP, Maria Angelina Sarmento, husu AIFAESA, I.P atu halo kontrola másimu ba estabelesimentu komersiál sira hodi kontrola sasán liu prazu.
Jornalista : Nelson de Sousa
Editór : Cancio Ximenes
