BAUCAU, 08 agostu 2024 (TATOLI) – Veternau João Soares Guterres “Mota” lakon vida hafoin mosu asidente tráfegu iha área Lanud, suku Bahu, postu administrativu Baucau Vila.
Xefe Seksaun Tránzitu Polísia Nasionál Timor-Leste (PNTL) Munisípiu Baucau, Sarjentu Xefe Polísia Alberto M. Piedade Gusmao esplika, asidente referida akontese bainhira vítima korta dalan husi parte karuk no tempu hanesan hetan xoke husi motorizada ho xapa-matríkula H.8760 ne’ebé kondus husi motorist ho inisiál AF idade 38 iha mini restaurante área Lanud, iha loron 07 fulan-agostu.
“Vítima la’o ba liman loos hosi karreta oin, maibé la haree motorizada diresaun mai husi Dili xoke nia monu mate fatin kedas,” Xefe Seksaun Polísia Tránzitu Baucau hateten iha Vila Nova, kinta ne’e.
Vítima João Soares Guterres “Mota” idade 66 husi Uatulari, nu’udar veteran, atuál hala’o kna’ar iha hanesan Koordenador Konsellu Veteranu Postu Administrativu Uatilari, munisípiu Vikeke.
Suspeitu utiliza motorizada husi diresaun Dili atu ba Uatucarbau, nune’e iha área akontesimentu mosu asidente, nune’e rezulta mos motorista kanek kmaan iha parte isin, no kontinua hetan asisténsia médika iha Ospitál Rejionál Eduardo Ximenes (HoREX, sigla Portugés) Baucau.
“Agora iha hela prosesu atu ba rejistu iha Ministériu Públiku,” Alberto akresenta.
Husi rezultadu investigasaun, maske vítima no suspeitu iha relasaun família hanesan tiu no subriñu maibé Komandu PNTL Baucau kontinua prosesa kazu asidente ne’e ba Ministériu Públiku.
Jornalista : Natalino Belo
Editór : Evaristo Soares Martins
