DILI, 08 agostu 2024 (TATOLI) – Ministru Juventude Desportu Arte no Kultura (MJDAK) Nelyo Isaac Sarmento rekoñese, fasilidade iha Timor-Leste sei mínimu parte ida kontribui ba derrota selesaun nasionál futeból iha eventu internasionál sira.
“Ita-nia falla mak ne’e, kampu futeból la másimu, entaun ita hein lai, kampu Becora ne’ebé konstroi ona di’ak tiha lai, kampu Federasaun Futeból Timor-Leste (FFTL) sei konstroi di’ak tiha lai mak ita halo preparasaun ne’ebé di’ak, agora ita ba lakon hela de’it iha jogu internasionál sira ne’e tanba fasilidade hanesan kampu laiha,” Ministru Nelyo hateten ba Agência TATOLI iha Palásiu Governu Dili, ohin.
Governante ne’e dehan, Governu esforsu maka’as hela oinsá kria fasilidade hotu ba selesaun nasionál sira liuliu futeból nune’e bele hadi’a prestasaun.
“Ita-nia kampu sira hanesan Comoro, Bintang Bidau, Kampung Alor, di’ak hotu ona fiar katak ita-nia selesaun sira halo treinamentu ho di’ak ita-nia selesaun bele hatudu prestasaun di’ak ona, ba orsamentu ita la kestiona, tanba infraestrutura kampu ne’e mak sai problema ba ita kontribui ba ita-nia derrota sira,” nia dehan.
Tuir Ministru Nelyo, durante ne’e laiha liga rai-laran tanba estrutura Liga Futeból Timor-Leste (LFTL) la’o la loos no laiha kampu ne’ebé adekuadu realiza liga. Ho nune’e Governu esforsu maka’as atu rezolve problema hotu ne’ebé iha.
Hanoin husi klube futeból
Prezidente klube primeira divizaun LFTL Assalam FC Ipolito Soares hateten, to’o agora seidauk bele ko’alia kona-ba alvu ba kompetisaun nível saida de’it iha rai-li’ur tanba preparasaun ba ekipa mínimu tebes.
“Ita sempre lakon iha jogu internasionál tanba mínimu preparasaun liga ba menus ou laiha infrastrutura futeból iha ita-nia rai,” Prezidente Ipolito tenik.
Tuir nia, daudaun ne’e kompetisaun iha Timor-Leste menus fó mós impaktu ba selesaun nasionál seniór no juniór.
“Buat ne’ebé presiza FFTL ho Governu halo mak primeiru, hadi’a lais infraestura futeból rai-laran, kampu ba treinu no dormitóriu ba atleta sira. FFTL ho órgaun liga tenki halo kompetisaun rai-laran hanesan Liga no kopa regular atubele prepara ita-nia atleta. Bainhira pontu importante hirak ne’e ita halo ona mak foin ita halo selesaun ba atleta futeból sira ho didi’ak, hafoin ida-ne’e hotu mak ita bele ko’alia preparasaun ba kompetisaun iha rai-li’ur no bele ko’alia tarjet ruma ba ita-nia ekipa nasionál,” nia hakotu.
Ho kestaun hirak ne’e, TATOLI tenta atu konfirma ho parte FFTL maibé la disponivel atu hato’o komentáriu.
Jornlaista: Hortencio Sanchez
Editór: Rafael Ximenes de A. Belo
