VIQUEQUE, 08 agostu 2024 (TATOLI)-Serbisu Sekretáriu Estadu Formasaun Profesionál no Empregu (SEFOPE) munisípiu Viqueque hahú simu kandidatu traballadór Austrália ne’ebé hetan valór ki’ik partisipa iha formasaun língua ingleza ne’ebé loke iha munisípiu Viqueque.
Diretór servisu SEFOPE Viqueque, Norberto Pereira Martins, esplika, formasaun dalen inglés ba traballadór sira-ne’ebé hetan valór ki’ik hahú simu iha loron 05 fulan-agustu no sei taka loron 09 fulan-agostu, ne’ebé kandidatu na’in-300 resin maka rejista. Formasaun ida-ne’e inglés báziku atu prepara joven sira ba serbisu ema-nia rain la’ós ko’alia lian tetun, maibé uza lian inglés nune’e joven sira tenke tuir formasaun hodi hatene lian inglés sai hanesan bukae ida, molok atu ba serbisu iha Austrália.
“Tanba ne’e prosesu rejista ba kandidatu sira-ne’ebé atu tuir formasaun ba lian inglés la’o di’ak. Ami mós espalla avizu inskrisaun ba postu lima, atu joven sira bele mai rejistu molok abertura kursu,” Norberto Pereira Martins, hateten ba Agência Tatoli, iha ninia knaar fatin, ohin.
Nune’e nia husu, joven sira-ne’ebé seidauk rejista karik hakbesik aan ba edifísiu SEFOPE Viqueque hodi rejista tanba posiblidade sei estende prosesu rejista loron ida ka rua. Tanba joven feto no mane balun dook husi minisípiu nune’e oportunidade ida-ne’e aproveita rejista hotu.
“Ami husu ba joven sira-ne’ebé laliu teste foin lalais ne’e mai rejista hodi tuir formasaun durante fulan tolu ramata, hafoin fó fali teste ba kandidatu sira. Kona-ba oráriu formasaun ami seidauk fó sai ba públiku tanba agora sei iha prosesu inskrisaun, depois taka inskrisaun foin ami públika orariu formasaun,’ nia informa.
Iha prosesu inskrisaun ne’e kandidatu sira lori kartaun eleitorál no aprezenta númeru teste nian ba administrasaun SEFOPE.
Daudaun ne’e SEFOPE Viqueque halo ona koordenasaun ho servisu edukasaun munisípiu Viqueque oferese ona sala eskola Ensinu Báziku Sentrál (EBC, sigla portugés) 01 Beloi hamutuk sala lima hodi fó formasaun lian inglés ba joven sira.
Enkuantu SEFOPE prepara ona formadór hamutuk na’in-haat; koordenadór ida no formadór na’in tolu ne’ebé sei oferese formasaun ba joven sira.
Iha fatin hanesan, Koordenadór formasaun lian inglés, Abrão Cardoso Amaral, haktuir, kona-ba formasaun referida agora dadaun formadór sira preparadu destaka ona iha munisípiu Viqueque hodi hanorin joven sira inglés báziku.
“Ha’u fiar katak númeru formadór sira-ne’ebé agora daudaun koloka iha Viqueque sufisente hodi hanorin joven sira. Tanba formasaun ne’e la’o, ami sei kria oráriu ba sira hodi partisipa iha aula laran,” nia subliña.
Kandidatu traballadór Austrália, Julio Fernandes, hateten, nia parte rejista ona formasaun lian inglés tanba ida-ne’e sai hanesan oportunidade ba joven sira hodi hasa’e koñesementu.
“Ohin ami mai rejistu ona, ami hakarak hadi’a ami-nia moris. Tan ne’e, ami sei esforsu hakarak tuir formasaun. Maibé, difikuldade ne’ebé ami hasoru maka agora daudaun ami hela iha Dili, ne’ebé ami husu SEFOPE se bele ami rejistu iha Viqueque tuir kursu iha Dili, atu nune’e ami labele lakon oportunidade,” nia tenik.
Tuir dadus, kandidatu traballadór husi munisípiu Viqueque ne’ebé tuir teste exenlente na’in-ida, very good (di’ak loos) na’in-41, good (di’ak) na’in-619. Atu tuir formasaun englés báziku hahú husi fair na’in-762, poor (mau) na’in-1.380, very poor (mediocre) na’in-349 ho totál 2.491. Enkuantu kandidatu ne’ebé hein atu ba serbisu iha Austrália hamutuk na’in-661 ne’ebé naran tama ona ba sistema hodi prepara atu ba serbisu iha Austrália.
Jornalista : Vitorino Lopes da Costa
Editór : Rafael Ximenes de A. Belo
