DILI, 08 agostu 2024 (TATOLI) – Ministru Juventude, Desportu, Arte no Kultura (MJDAK), Nelyo Isaac Sarmento hateten, garante jogu Komunidade Ko’alia Lian Portugés (CPLP-sigla portugés) sei la’o iha Timor-Leste tinan oin ho susesu tanba daudaun ne’e Governu halo preparasaun másimu tebes.
“Jogu sei la’o iha tinan oin ho di’ak, preparasaun ba kampu agora ita halo hela, to’o tinan oin kampu sira prontu ona para ita hala’o atividade ne’e. Estádiu Dili iha fulan-novembru mak orsamentu balun sei iha ita halo kaber liu de’it bele hala’o ona jogu sira,” Ministru Nelyo katak ba jornalista TATOLI iha Palásiu Governu Dili, ohin.
Nia dehan, kona-ba situasaun no preparasaun hotu sei lori ba diskute iha Konsellu-ministru Ministeriu Juventude Desportu CPLP tanba desizaun hotu sei foti husi Sekretariadu CPLP.
“Maibé membru Governu husi nasaun CPLP nian barak mak troka ona hanesan Angola, Guiné-Bissau, Portugal mós troka entaun ita tenke reuniaun fila fali atu hanoin fali, la’ós fasil maibé iha asuntu balun ne’ebé sei halo diskusaun didi’ak atu realiza eventu ne’e iha Timor-Leste,” nia tenik.
Ministru ne’e hatutan, Timor-Leste preparadu no depende ba nasaun membru sira hakarak mai hala’o jogu ne’e ka la’e. Maibé, desizaun hotu sei deside iha Konsellu Ministru Ministru CPLP ba Juventude Desportu fulan-novembru ne’ebé sei hala’o iha Portugal.
Kampu ne’ebé Governu prepara hela ba jogu CPLP mak hanesan, Estádiu Gleno, kampu Becora, Estádiu Munisipál Dili, Voleiból Praia iha Lecidere, kampo tenis iha UNTL no Jináziu Dili.
“Ita foti fatin ne’ebé tuir modalidade sira ne’ebé atu joga ne’e, ita foti tuir mós kondisaun ne’ebé ita iha. Atu halo jogu Karate-do, Taekwondo, Basketból iha Jináziu Dili, futeból ita sei hala’o iha Becora no Gleno, jogu ba Xadres nian Sentru Konvensaun Dili preparadu,” Ministru ne’e katak.
Jogu CPLP sei fó prioridade ba modalidade hamutuk sia mak hanesan Atletizmu, Basketból, Voleiból Praia, Tenis Kampu, Futeból, Taekwondo, Karate-do no Xadres.
Nasaun ne’ebé iha direitu absoluta atu partisipa iha jogu CPLP mak hanesan, Portugal, Brazíl, São Tomé e Principé, Cabo Verde, Guiné-Bissau, Moçambique, Angola, Guiné Equatorial no Timor-Leste.
Tuir oráriu ne’ebé publika sai ona jogu ne’e sei realiza hahú loron 17-27 fulan-jullu tinan-2025.
Jornlaista: Hortencio Sanchez
Editór: Rafael Ximenes de A. Belo
