HNGV halo ezersísiu simulasaun, prepara no antesipa kazu insidente ruma mosu iha ámbitu vizita Amu Papa
DILI, 08 agostu 2024 (TATOLI) – Hospitál Nasionál Guido Valadares (HNGV), Departamentu Emerjénsia prosede ezersísiu simulasaun ba insidente vítima massal atu prepara kapasidade no sistema saúde nian hodi atende sidadaun sira bainhira hetan asidente ka moras ruma.
“Ohin ita halo simulasaun ba insidente vítima massal ida-ne’e atu tes sistema karik iha asidente ruma la’os de’it ba atividade ita hasoru iha fulan-Setembru vizita Amo Papa nian maibé preparasaun ne’e ba mós vítima massal iha tempu saida de’it”, Diretora Asisténsia Klínika HNGV, Ana Maria Pereira Magno, hateten ba jornalista sira iha HNGV, ohin.
Nia mós husu ba família pasiente atu kolabora ho pesoal saúde sira no mós seguransa hodi servisu hamutuk no kumpre regra ospitál nian iha momentu halo hela tratamentu ruma.
“Bainhira akontesimentu hanesan ne’e, espera família sira bele koopera ho pesoál saúde sira iha ospitál liuliu seguransa sira hodi fó tempu ba pesoál saúde sira atu halo atendimentu ba pasiente”, nia informa.
Nia hateten, profisionál saúde mós servisu hamutuk hodi Falintil-Forsa Defeza Timor-Leste (F-FDTL), Polísia Nasionál Timor-Leste (PNTL), Servisu Nasionál Ambulánsia, Emerjénsia Médika (SNAEM) no mós estudante enfermajen UNTL.
“Klaru simulasuan ida-ne’e la perfeitu maibé hosi ida-ne’e ami bele tes ami-nia kapasidade to’o iha ne’ebé atu bele halo prepasaun di’ak liután no ami mós bele halo planu simulasaun, tempu mai tán atu bele reforsa ami-nia kapasidade ba atendimentu pasiente sira”, nia subliña.
Kona-ba prepasaun hosi HNGV, ba vítima insidente massal ne’e, reabilitasaun fatin la’o hela no treinamentu ba rekursu umanu kontinua la’o maske la sufisiente, maibé sira garante sei la abandona pasiente sira.
“Agora la sufisiente maibé simulasaun ne’e ho setting ne’ebé iha ne’e bazeia ba akontesimentu ruma, karik ita tenke fó atendimentu tanba ne’e mak momentu ida-ne’e, ami teste ami-nia kapasidade no futuru ami sei teste fali tan hodi kompleta atendimentu ho di’ak ba pasiente”, nia relata.
Xefe Departamentu Emerjénsia HNGV, Julia Rodrigues Quitão, hatutan ezersísiu ne’e ho objetivu atu prepra aan no antesipa bainhira insidente ruma mosu iha ámbitu vizita Amu Papa.
“Bainhira pasiente liu ami-nia forsa atu atende, ami sei kolabora ho departamentu sira iha laran, nune’e sira bele atende pasiente ne’ebé aprezenta iha amerjénsia”, nia deklara.
Nia relata, kona-ba prepasaun iha sala emerjénsia nian, sira nafatin prepara tanba hanesan odamatan boot Ministériu Saúde, tanba ne’e kualker tempu sira prepara atu hasoru iha situasaun saida de’it.
Pesoal saúde ne’ebé iha sala emerjénsia ospitalár prepra atu atende situasaun hanesan, médiku espesialista no xefe departamentu hamutuk na’in-hitu, médiku jerál 17 no enfermeiru 40.
Jornalista : Felicidade Ximenes
Editór : Zezito Silva
