DILI, 08 agostu 2024 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul ‘Falur Rate Laek’, dehan Komandu F-FDTL no PNTL sei garante situasaun seguransa ho di’ak, laiha perturbasaun iha ámbitu vizita Papa Francisco.
“Ami ohin iha ne’ebá ne’e hetan konkluzaun katak informasaun sira ne’ebé agora la’o ne’e propaganda, tanba ne’e NGO sira atu kolabora ho seguransa no defeza inklui komponente hotu hodi fó vijilánsia ba ema ne’ebé ke atu halo asaun sira ne’e”, Jenerál Falur, hateten ba jornalista sira hafoin hasoru malu ho Organizasaun Naun Governamentál sira iha salaun Komandu Jerál PNTL, Caicoli, kinta, ohin.
Falur husu ba Organizasaun Naun Governamentál sira atu kolabora ho parte seguransa no Defeza, atu iha informasaun kona-ba manifestasaun, tenke informa ba sala situasaun ne’ebé estabelese iha komandu PNTL, atu halo antesipasaun.
Jenerál alerta katak sei la tolera kualker asaun sira ne’ebé mosu perante vizita Papa.
“Ita sei la tolera kualker asaun saida de’it, kuandu se de’it mak halo krime, ita sei la tolera ida-ne’e”, nia dehan.
Iha fatin hanesan, Komandante Jerál PNTL, Komisáriu Jerál Polísia, Henrique da Costa, Komandu PNTL no F-FDTL realiza enkontru ho sosiadade sivil ne’e importante atu envolve sosiedade sivil iha ámbitu vizita sua Santidade Papa mai Timor-Leste oinsá kolabora ho autoridade seguransa no defeza hodi fó susesu ba seguransa.
“Ita bo’ot sira iha papél importante hodi kontrola mós ba servisu instituisaun Estadu sira, inklui PNTL ho F-FDTL, ita bo’ot sira mós sai hanesan matan no tilun komunidade sira-nia. forsa no polísia agora ita bo’ot sira-nian tanba ita hotu kolabora atu garante estabilidade”, nia dehan.
Nia hakuit, Komandu PNTL no F-FDTL mós halo ona enkontru ho lideransa komunitária, parte igreja atu hotu kolabora ho polísia no forsa hodi tau matan ba seguransa durante vizita Papa.
Reprezentante Asia Justice and Rigth (AJAR), Inocencio Xavier, hateten sosiedede sivil koopera ho autoridade seguransa no defeza atu fó susesu ba Amo Papa nia vizita mai Timor-Leste.
“Ita hateten vizita ida-ne’e nudar vizita mais alta entidade ba ita-nia rai, ita hotu iha obrigasaun atu fó apoiu ba ita-nia autoridade seguransa no defeza hodi kontribui informasaun ba malu”, nia haktuir.
Nia reala konstitusaun fó dalan hodi fó apoiu solidaridade internasionál maibé vizita Amo Papa ne’e nudar vizita importante tanba ne’e entidade hothotu tenke koopera.
“Ita hateten katak ita-nia konstitusaun mós garante katak fó apoiu solidaridade internasionál, maibé ha’u hanoin vizita ida-ne’e hanesan vizita importante tebes ba ita-nia nasaun, ha’u fi’ar sei la mosu buat sira hanesan ne’e. Ha’u fiar vizita ida-ne’e sei la di’ak. Ita hotu hakarak tane nafatin obra ne’ebé ita-nia aman sira rai hela ne’e. Laiha ema ida mak atu trai obra sira ne’e. Ami sei fó apoiu ba seguransa no defeza atu vizita Amo Papa. Kuandu liu tiha vizita Amo Papa ne’e ita hakarak halo saida ne’e depende tanba lei mós fó dalan ba ida-ne’e”, nia adianta.
Inocencio mós apresia ba servisu autoridade seguransa no defeza nia preparasaun Amo Papa nian ne’ebé halo enkontru ho entidade hotu hodi husu apoiu ba seguransa no defeza atu eventu bo’ot ne’e bele lao di’ak.
“Ha’u apresia ho autoridade seguransa no defeza nia servisu, mai ita hotu hamutuk hodi fó apoiu ba ita-nia seguransa hodi asegura vizita Papa mai ita-nia rai bele lao di’ak iha ámbitu ne’ebé hakmatek”, nia konklui.
Jornalista: Natalino Costa
Editór : Zezito Silva
