DILI, 08 agostu 2024 (TATOLI) – Ministériu Saúde hamutuk ho Organizasaun Mundiál Saúde Timor-Leste (OMS), halo análize no avalia bee no saneamentu (Global Analysis and Assessment of Sanitation and Drinking-Water) ho objetivu atu introdús síkulu no benefísiu ba nasaun sira no monitorizasaun nasionál, rejionál no global.
“Ami hetan apoiu husi Organizasaun Mundiál Saúde Timor-Leste ne’ebé ohin diskute análize no avaliasaun globál ba bee no saneamentu ho nia objetivu atu introdús síkulu GLAAS 2024 no benefísiu ba nasaun sira ba monitorizasaun nasionál, rejionál no global, tanba GLASS hanesan sistema ida ne’ebé nasaun unida sira utiliza hodi sukat progresu dezenvolvimentu bee saneamentu no ijiene”, Vise Ministru ba Operalizasaun Ospitál, Flavio Brandao, informa ba jornalista sira, iha Hotel Timor, ohin.
Nia dehan, iha konsulta nasionál revizaun ba planu estratéjiku ida-ne’e hamutuk ho OMS no parseiru dezenvolvimentu sira seluk hanesan Bee Timor-Leste (BTL,E.P) hodi ko’alia oinsá halo investimentu di’ak liutáan ba bee no saneamentu.
“Ita konsiente katak ita atinje ona mais 80% asesu ba bee moos iha Timor-Leste, tantu área rurál no urbana, maibé iha momentu avaliasaun ida-ne’e atu haree fila fali oinsá mak atu halo di’ak liután investimentu ida ne’ebé mak ita sura hanesan investimentu poupansa iha ita-nia rain, tanba bee importante no nia efeitu ba ijiene, ne’e duni oinsá mak ita investe di’ak iha fasilidade públiku sira iha ospitál, sentru saúde sira katak bee di’ak no kualidade, entaun ida-ne’e ita tenke haree nia kualidade hodi minimiza ka redús moras sira ne’ebé mak iha”, nia relata.
Iha fatin hanesan, Reprezentante Organizasaun Mundiál Saúde iha Timor Leste (OMS), Arvind Mathur, hateten OMS hamutuk Governu atu diskute pilár fundamentál ida kona-ba saúde públika ne’ebé fó impaktu ba bee, saneamentu no ijiene (BESI).
“Ohin loron, ita halibur hamutuk atu diskute pilár fundamentál ida kona-ba saúde públika ne’ebé fó impaktu ba ita hotu, bee, saneamentu no ijiene (BESI). Elementu hirak-ne’e la’os de’it nesesidade sira mak direitu bazikú ne’ebé apoia ita-nia populasaun nia dignidade no moris-di’ak”, Arvind haktuir.
Arvind dehan, bee moos no saneamentu ne’ebé di’ak sai prinsipál ba prevensaun no kontrolu moras sira, se laiha, ema sei hasoru moras sira, sei akontese má nutrisaun no problema saúde sira seluk.
“Iha Timor-Leste, ita halo ona esforsu signifikativu, ohin loron, 80% husi ita-nia populasaun rurál no 96% husi ita-nia populasaun urbanu, pelumenus asesu ba bee báziku, signifika katak ema bele hetan bee iha menutu 30 nia laran, hahú husi tempu kolesaun husi fonte bee di’ak. Progresu ne’e di’ak tebes, maibé ita tenke rekoñese katak ita-nia viajen la’o sei dook hela. Ita presiza asegura katak bee ne’ebé seguru la’ós de’it disponivel no asesivel, maibé prátika ijiene no saneamentu ne’ebé forte, mós presiza implementa”, nia subliña.
Vise Prezidente Komisaun Ezekutiva Bee Timor-Leste (BTL,E.P) ba asuntu Sistema Bee Saneamentu no Drainajen, Gustavo da Cruz, relata katak GLASS hanesan sistema ida ne’ebé nasaun unidas utiliza hodi sukat progresu dezenvolvimentu bee, saneamentu no ijiene.
“Iha sasan sira ne’ebé mak nasoes unidas sira uza, iha buat tolu, dahuluk mak GLASS, daruak SWA no datoluk mak OMS ho Unicef utiliza mak Programa Monitorizasaun Konjunta (JMP), entaun ferramenta sira ne’e mak atu bele halo sukat Governu nia atinjimentu ba Bee Saneamentu no Ijene (BESI), to’o ona iha ne’ebé, tanba tuir relatóriu ne’ebé mak iha katak 80% ema asesu ona bee moos iha ita-nia rain la’o ho di’ak, tantu rurál no urbana”, Gustavo da Cruz afirma.
Análize no avaliasaun globál ba bee no saneamentu (GLAAS-sigla English) mak inisiativa ida-ne’ebé implementa husi Organizasaun Mundiál Saúde iha kolaborasaun ho UNICEF hodi naran UN-Water. GLAAS (Global Analysis and Assessment of Sanitation and Drinking-Water) nia objetivu mak atu fornese polítika no foti desizaun iha nivel hothotu ho análiza ida-ne’ebé akuradu. Atualizasaun globál ida kona-ba sistema bee saneamentu no ijiene (BESI), inklui enkuadramentu polítika institusionál, sistema monitorizasaun, regulamentu, rekursu umanu no finansas ne’ebé sei foka espesiál liu ba polítika, planu no tarjetu nasionál.
Jornallista : Felicidade Ximenes
Editór : Zezito Silva
