DILI, 08 agostu 2024 (TATOLI)—Estadu Unidu liuhusi Ajénsia Estadu Unidu ba Dezenvolvimentu Internasionál (USAID, sigla inglés) apoiu Organizasaun Naun Governamentál (ONG) lokál sia halo lansamentu ba produtu peskiza husi parseiru ONG ho tema ‘hamutuk ita promove governasaun di’ak no polítika bazeia ba evidénsia.’
Lansamentu ne’e ba dahaat nian, ho objetivu atu halo advokasia no polítika ne’ebé di’ak liuhusi organizasaun sosiedade sivíl sira iha Timor-Leste.
Reprezentante Misaun USAID iha Timor-Leste, Robert Barton, hateten, peskiza dahaat ne’e aborda asuntu importante sira, inklui mekanizmu subvensaun husi parseiru dezenvolvimentu ba ONG lokál no nasionál sira, planu setór edukasaun inkluzivu, saúde ba ema ho defisiénsia, oportunidade empregu ba graduadu husi eskola vokasionál sira, asesu ba saúde iha área rurál sira, rede referál protesaun ba labarik, produsaun agríkola iha Lautém, papél grupu autodefeza nian hodi promove pás, no asesu ba bee.
“ONG sira hala’o papél krítiku ida iha dezenvolvimentu sustentável. ONG sira ho kualidade a’as ajuda responsabiliza Governu sira ba governasaun ne’ebé justu no responsivu. Estadu Unidu Amérika liuhusi USAID sente orgullu atu apoia ami-nia parseiru ONG sira hodi dezenvolve sira-nia kapasidade peskiza no advokasia,” Robert Barton, hato’o iha nia diskursu, iha salaun City 8, Manleuana, kinta ne’e.
Notísia relevante : USAID-IOB lansa sentru dezenvolvimentu foinsa’e iha Maliana
Nia dehan, atividade ohin ne’e hala’o durante loron-rua, hahú loron 08/08 to’o 09/08, nune’e durante loron ne’e ONG partisipante sia sei fahe deskobrimentu peskiza hodi hametin parseria polítika no viazibilidade ba sira-nia serbisu ho Governu no komunidade.
ONG sia ne’ebé hetan apoiu husi USAID mak hanesan Asosiasaun Defisiénsia Timor-Leste (ADTL), Belun, Rede Reabilitasaun Baze Komunidade Timor-Leste (CBRNTL), Fórum ONG Timor-Leste (FONGTIL), Fundasaun Hafoun Timor-Leste (FHTL), Programa Monitorizasaun Sistema Judisiáriu (JSMP), Many Hands One Nation (MAHON), Mata Dalan Institute (MDI), no Programa Espesial ba Prioridade ba Ema Kiak (PROSPEK).
Diretór Ezekutivu Asosiasaun Defisiénsia Timor-Leste (ADTL), Cesário da Silva, hateten, prosesu peskiza ne’e hala’o ho profisionál relasiona ho setór sira ne’ebé iha ligasaun no utilizasaun estudu ne’e hasa’e kolaborasaun Governu ho sosiedade sivíl no destaka oinsá Governu bele atende nesesidade sidadaun sira ho efetivu.
“Setór sira ne’ebé hola parte iha peskiza ne’e iha relasaun ho edukasaun, formasaun, empregu, lei nomós atividade pás no estabilidade nomós deskobrimentu sira ne’ebé ami halo kona-ba arte-marsiál no arte-rituál sira. Ida-ne’e importante tebes husi relatóriu ONG sia no ami fiar katak relatóriu ida-ne’e bele ajuda instituisaun relevante sira hodi foti desizaun,”Cesário da Silva, tenik.
Diretór Fórum Organizasaun Naun-Governamentál Timor Leste (FONGTIL), Valentim da Costa Pinto, hateten, USAID nia programa apoiu ne’e la’o ona kuaze tinan-rua no FONGTIL mós hala’o hela peskiza kona-ba distribuisaun subsídiu públiku.
“Liu-liu husi ADTL, ami aprezenta kona-ba oinsá serbisu edukasaun espesiál ne’e fó ba ema ho defisiénsia sira no husi FONGTIL iha ne’e ami hakarak haree oinsá bele garante ezisténsia ONG ida ho apoiu husi parseiru apoiu sira, iha relatóriu ohin husi MAHON, ami aprezenta mós relatóriu kona-ba oinsá atu promove empregu ba joven produtivu sira,” nia dehan.
Ministra Edukasaun, Dulce de Jesus, reprezenta Vise Primeiru-Ministru, Mariano Assanami Sabino, konsidera relatóriu ne’e importante tebes ba Governu tanba nu’udar evidénsia hodi foti desizaun iha implementasaun polítika sira.
“Relatóriu sira ne’e, ida-ne’ebé espesifikamente ba setór edukasaun, ami sei koko atu uza relatóriu ne’e ho di’ak, tanba sira fó relatóriu ne’e fó evidénsia ne’ebé di’ak liu ba Governu tanba Governu mesak labele halo buat ida maibé serbisu hamutuk bele rezolve situasaun hotu,” nia katak.
USAID Timor-Leste nia atividade advokasia ba Boa Governasaun, enkuantu ONG aumenta kapasidade advokasia, peskiza, análiza no rede ONG, inklui haburas ambiente apoiu ba ONG independente sira.
USAID rasik fó ona kontribuisaun liu millaun $323 ba dezenvolvimentu, dezde Timor-Leste hetan independénsia, hodi promove dezenvolvimentu inkluzivu no pasífiku ba nasaun ne’ebé prósperu liu, saudável, no auto-sufisiente.
Jornalista : Arminda Fonseca
Editora : Julia Chatarina
