DILI, 09 agostu 2024 (TATOLI) – Komandu FALINTIL–Forsa Defeza Timor-Leste (F-FDTL) no Polísia Nasionál Timor-Leste (PNTL) ofisialmente dezloka forsa tarrefa konjunta hodi fó seguransa ba vizita Amu Papa mai Timor-Leste.
Dezkolasaun ne’e liuhusi formatura jerál ne’ebé halo iha Unidade Espesiál Polísia (UEP) Bairro Pite no asiste direta husi reprezentante Xefe Estadu Maiór Jenerál Forsa Armada (XEMFA) Brigadeiro Jenerál Cornelio Ximenes “Maunana” no Segundu Komandante Jerál PNTL, Komisáriu Polísia Pedro Belo.
Forsa tarrefa konjunta mai husi membru F-FDTL komponente forsa terrestre, navál no aero lijeira.
Komponente forsa terrestre, pelotaun ida husi Unidade Polísia Militár (PM), unidade FALINTIL. Komponente navál ida husi forsa fuzileiru no komponente aero lijeira.
Komandu Polísia Nasionál Tmor-Leste (PNTL), kompostu husi pelotaun tolu husi Unidade Espesiál Polísia hanesan Komandu Operasaun Espesiál (COE), Korpu Seguransa Pesoál (CSP), pelotaun ida husi Batallaun Orden Públika (BOP), pelotaun ida husi Unidade Patrollamentu Fronteira (UPF), Unidade Polísia Marítima (UPM), Sentru Formasaun Polísia (CFP), Pelotaun ida husi Departamentu Seguransa Rodaviaria Nasionál, Pelotaun ida husi Servisu Migrasaun no pelotaun ida husi Komandu Jerál PNTL.
Forsa tarrefa envolve sei hala’o operasaun iha territóriu Timor-Leste ne’ebé hanaran ‘Pombo Mutin’ ne’ebé antes ne’e Komandu F-FDTL no PNTL estabeese ona hodi garante pás no estabilidade iha ámbitu vizita Papa.
Forsa Tarrefa sei asegura másima ba fatin vizita Papa hanesan Aeroport, Portu no liña fronteira sira, ne’ebé sei lidera husi Komandante Komponente Terrestre Domingos da Costa Soares “Dobu” no Superintendente Xefe Polísia José Soares.
Segundu Komandante Jerál PNTL, Komsáriu Polísia, Pedro Belo, hateten forsa tarrefa ninia funsaun mak atu halo operasaun konjunta hodi asegura seguransa iha ámbitu vizita Papa.
“Iha operasaun ida-ne’e, forsa tarrefa konjunta mai ho funsaun rua, ida mak prevensaun no ida mak sei atua ho medida represaun ka uza forsa”, Pedro Belo dehan iha serimónia dezlokasaun ba territóriu nasionál, iha Kuartel UEP, sesta ne’e.
Nia dehan, Forsa Tarrefa mós halo operasaun auto stop, iha Dili laran tuir orden operasaun komandu rua fó sai ona.
“Operasaun sira ne’e hotu, ita halo nudar meiu ida ba prevensaun hodi fó hanoin ba ita hotu katak tenke koopera ho autoridade polísia no forsa hodi ita fó susesu ba vizita Amo Papa mai iha ita-nia rai bele lao di’ak. Maibé iha ema balun ne’ebé mak hakarak atu koko nafatin atu estraga estabilidade mak ita tama ba ita sei uza medida represaun”, nia adiamta.
Nia dehan, funsaun medida represaun ida-ne’e, sei implementa bainhira membru sira ne’ebé hola parta iha operasaun forsa tarrefa konjunta haree katak iha ema balun hakarak koko kria pertubasaun.
Belo esplika, Konsellu Ministru apropva ona, medida empeñamentu sira hodi fó kbi’it ba forsa no polísia atu halo atuasaun represivu ka uza forsa iha ámbitu vizita Amo Papa nian bainhira iha ema ruma ne’ebé hanoin hodi kria instabidade.
Nia dehan, antes Amo Papa nia vizita, sei iha eventu importante sira hanesan komemora loron FALINTIL iha 20 agostu no komorasaun loron referendum 30 agostu ne’ebé sei konvida Prezidente India no Sekretáriu Jerál ONU.
Nia husu ba ekipa no autoridade forsa no polísia atu uza atuasaun ho media represaun ne’e atu ema hotu ne’ebé moris iha rai doben ida-ne’e bele sente seguru katak atividade importante sira ne’ebé mesiona ne’e sira bele tuir ho livre,
“Ida-ne’e mak reponsavél bo’ot ita nia instituisaun rua ida-ne’e no ema sei koko ita-nia profisionalizmu, iha tempu vizita importante ida-ne’e”, nia dehan.
Belo husu ba forsa tarrefa konjuntu hodi kumpre buat importante hanesan pontulidade disipliña no respoblidade, atu labele fó fatin ba kuakler sé de’it atu perturba iha ámbitu vizita Papa.
“Se ita laiha pontualidade mak problema, ita fo fatin ba ema seluk atu halo atividade kriminál iha ita-nia rai doben, mas kuandu ita rona informasaun, ita tama ho pontualidade tuir oras hodi halo atividade sei la akontese atu krime’’, konklui.
Jornalista: Natalino Costa
Editór : Zezito Silva
