DILI, 09 agostu 2024 (TATOLI)—Reprezentante povu iha uma fukun Parlamentu Nasionál (PN) liuhusi Deputadu CNRT, José Virgílio, husu Ministériu Obra Públika (MOP) liuhusi Institutu Jestaun Ekipamentu no Apoiu Dezenvolvimentu Infraestrutura Institutu Públiku (IGEADE, I.P) normaliza urjente mota husi ponte My Friend iha Bemori to’o iha Bidau, Dili.
“Ha’u hakarak levanta nafatin ba Obra Públika liga ba mota Bidau, no Bidau nia mota ne’e to’o iha ponte ospitál nian to’o ba iha Kuluhun no ponte Kuluhun ba to’o iha ponte May Friend, ne’ebé mota ne’ebé agora ita haree katak iha tinan hirak ba kotuk estragu husi inundasaun ne’ebé iha mota sira ne’e balun hadi’a ona. Iha ponte My Friend Bemori nian nian ne’e, husi Lahane tún mai to’o ponte May Friend ne’e sira hadi’a ona iha Governu anterior. Agora ponte My Friend nian tun mai to’o ospitál Biadau nian ne’e grave tebe-tebes,” Nia hato’o iha uma fukun Parlamentu Nasionál.
Tanba ne’e, nia dehan, komunidade sira iha ne’e husu beibeik hodi hato’o ba Ministériu Obra Públika (MOP) hodi tau matan hadi’a ho emerjensia, tanba tempu badak nia laran, iha fulan rua ka tolu mai tan udan boot sei akontese, nune’e bele protezj eskola, ospitál iha área refere bainhira iha tempu udan.
Antes ne’e mós membru Parlamentu Nasionál balun liuhusi reuniaun plenária levanta hodi husu IGEADE, I.P atu hasai sedimentasaun rai iha estrada públiku balun ne’ebé kauza husi udan, nune’e hafoin udan hotu halo rai-rahun au’ar makaas difikulta movimentu sidadaun no transporte sira.
Jornalista : Nelson de Sousa
Editór : Cancio Ximenes
