DILI, 09 agostu 2024 (TATOLI)—Organizasaun Nasaun Unida ba Fundu Labarik sira (UNICEF, sigla inglés), sesta ne’e, apoia materiál tanke bee hamutuk 85 no jerigen hamutuk 2.000 ba Bee Timor-Leste, Empreza Públika (BTL, E.P) hodi distribui ba munisípiu haat.
Reprezentante UNICEF iha Timor-Leste, Patrizia Di Giovanni, hateten, objetivu sira-nia parte apoiu materiál bee nian ba BTL, E.P ne’e hanesan asaun antisipatóriu atu responde ba el-niño ne’ebé mak tuir espetativa sei akontese ba Timor-Leste.
“Asaun apoiu ne’ebé ita halo ne’e, hanesan antisipamente preparadu nune’e, responde ba kualker situasaun iha tempu bailoron naruk liuliu ba komunidade hirak ne’ebé mak fatin balun ami hamutuk ho BTL, E.P identifika sai hanesan vulneravel tebes ba bee-moos iha tempu bailoron,” Patrizia Di Giovanni, hateten, iha Hudi-Laran, Dili, ohin.
Reprezentante ne’e dehan, apoiu ne’ebé ohin, entrega on aba BTL, E.P ne’e sira mak sei fornesimentu tanke sira ne’e, suku ka aldeia iha munisípiu haat.
Nia dehan, munisípiu haat ne’ebé sei hetan tanke bee no jerigen ne’e mak ba munisípiu sira hanesan mak Bobonaro, Covalima, Lautém no Manufahi, tanba munisípiu hirak ne’e Bee Timor-Leste konsidera risku aas tebes atu asesu bee-moos iha tempu bailoron naruk.
“Ami atu hateten, katak el-niño ne’e atu mai dunu ka lae, maibé ita tenke antipia halo preparasaun uluk,” nia dehan.
Iha fatin hanesan, Vise-Prezidente Komisaun Ezekutiva BTL, E.P, ba Asuntu Sistema Bee, Saneamentu no Drenajen, Gustavo da Cruz, hateten lori Governu nia naran agradese UNICEF iha Timor-Leste tanba bele apoia BTL halo antisipasaun ka mitigasaun ba el-niño ne’e.
“Ita halo hand over (entrega) ba tanke bee hamutuk 85 no masa kuru bee (jerigen) 2.000, ida-ne’e sei distribui ba komunidade ne’ebé ita identifika sai vulnerável liu tempu el-niño,” nia dehan.
Vise-prezidente ne’e dehan, sasán sira ohin entrega ona ne’e, semana oin, ekipa sei halo mobilizasaun ba munisípiu haat ne’e, no sei halo mós instalasaun ba tanke nia tuur fatin iha aldeia no bairru sira ne’ebé bee arraska.
“Ita sei halo atendimentu mak tanke sira ne’e instala hotu tau tanke, ita ho karreta ba tuir ense bee sira ne’e ba tanke komunidade asesu. Esforsu seluk mak karik kanalizasaun sira ne’ebé iha bee menus la halai mak BTL sei ense hotu bee ba tanke sira ne’e, nune’e komunidade bele konsumu,” nia garante.
Vise-Prezidente Komisaun Ezekutiva BTL, E.P, ba Asuntu Sistema Bee, Saneamentu no Drenajen, Gustavo da Cruz, esplika, daudaun ne’e ba uluk ba munisípiu haat ne’e tanba kada tinan el-niño mosu sira ne’e vulneravel tebes maibé karik ba munisípiu sira seluk ne’ebé akontese mós el-niño makaas presiza mak BTL, E.P hamutuk ho UNICEF sei kontinua apoiu hotu.
“Ho apoiu tanke no jerigen ne’ebé oferese ba munisípiu haat ne’e iha komunidade hamutuk 13.000, ho xefe família 2,600 mak sei sai benefisiáriu bá bee-moos, no tanke bee ne’e rasik ita fahe kada munisípiu haat ne’e, munisípiu tolu hetan hetan 20 no Bobonaro mak hetan 25. Ita-nia ekipa iha munisípiu preparadu ho sei halo serbisu liuliu tanke sira ne’e ita monta haree fatin sentru sira husi aldeia ka suku nian,” nia dehan.
Jornalista : Arminda Fonseca
Editór: Rafael Ximenes de A. Belo
