BAUCAU, 12 agostu 2024 (TATOLI) – Ospitál Rejionál Eduardo Ximenes (HoREX, sigla portugés) rejista pasiente hamutuk na’in-17 lakon vida durante fulan-juñu.
Diretór ezekutivu HoREX Baucau, Claudino Ximenes, esplika, husi númeru referida kompostu husi labarik na’in-rua, bebé na’in-haat no na’in-11 idade avansadu ne’ebé na’in-hitu hakotu iis iha sala intensivu no na’in-haat seluk lakon vida tuir dalan husi uma bainhira transporta ba ospitál menus husi oras 24.
“Ospitál labele halo milagre bainhira mai kondisaun todan, fó ai-moruk ida ba kura kedas iha oras ida laran, maibé tenke lori tempu, tanba iha ema balun halo tratamentu to’o fulan-neen ka dala ruma moris tomak la’o ho ai-moruk,” Diretór Ezekutivu HoREX hateten iha Vila Nova, segunda ne’e.
Mesmu pesóal saúde halo esforsu atu salva maibé pasiente hirak-ne’e maioria afeta moras bronkonemonia, infesaun iha fuan ho durasaun ne’ebé tempu naruk.
Claudino Ximenes, rezeita informasaun kona-ba falta ai-moruk kauza ba pasiente sira lakon vida maibé problema ne’ebé loloos mak pasiente sira falta kontrola saúde ho di’ak iha fasilidade saúde sira.
“Sira baixa ne’e mós mai ho kazu todan entaun baixa loron ida rua labele salva iha momentu ne’ebá,” Claudino Ximenes akresenta.
Claudino husu komunidade sira fó atensaun ba saúde no bainhira hetan moras hakbesik aan ba fasilidade saúde sira-neebé besik hodi halo tratamentu nune’e prevene labele afeta to’o grave.
Jornalista : Natalino Belo
Editór : Evaristo Soares Martins
