DILI, 12 agostu 2024 (TATOLI)—Ekipa husi Ministériu Edukasaun (ME), segunda ne’e, halo aprezentasaun iha Komité Revizaun Polítiku ba Orsamentu Jerál Estadu (OJE) 2025, ne’ebé antes ne’e ME simu tetu 99.900.854.
Orsamentu ne’e kompostu husi saláriu no vensimentu $85.923.100, bens no servisu korrente $9.720.476, transferénsia públika $4.257.278, kapitál menór laiha, no kapitál dezenvolvimentu laiha.
“Ohin ami halo aprezentasaun tuir orsamentu ne’ebé Mak Ministeriu Edukasaun simu husi Ministériu da Finansa pur volta millaun $99-resin. Ami aloka ba kategoria saláriu vensimentu, bens servisu no transferénsia públika,” Ministra Edukasaun, Dulce de Jesus Soares, hatete, hafoin aprezenta orsamentu iha salaun MF, Aitarak-laran, segunda ne’e.
Notísia relevante : KM aprova rezolusaun Governu kona-ba definisaun komité revizaun OJE 2025
ME mós sei halo diskusaun kona-ba kapitál menór no kapitál dezenvolvementu tanba seidauk iha alokasaun.
“Ami sei halo filafali diskusaun ida kona-ba kapitál menór no kapitál dezenvolvementu, maibé serbisu sira ne’e hotu atu fó kontinuidade ba Ministériu Edukasaun ne’e iha área saláriu no vensimentu, kontinua saláriu profesór, kurríkulu, jestaun eskolár, serbisu rutina Ministériu Edukasaun nian iha nível eskolaridade nomós iha nível munisipál no nasionál,” nia akresenta.
Ministériu iha prioridade hanesan reforsa administrasaun iha, apoiu iha nível ensinu haat hanesan pre-eskolár, ensinu bázika, ensinu sekundáriu jerál no ensinu tékniku vokasionál.
“Ami simu duni adisionál maibé ne’e iha faze diskusaun hela nafatin tinan-tinan Ministériu Edukasaun sempre aprezenta adisionál tanba tetu ne’ebé mak ami simu iha de’it orsamentu ba kategoria tolu mak saláriu no vensimentu, bens servisu, transferénsia públika. Ami husu adisionál diskusaun kontinua ba kategoria kapitál menór no kapitál dezenvolvimentu,” governante ne’e dehan.
Durante diskusaun iha ámbitu KRO, ME husu adisionál miliaun $20-resin, nune’e Ministra espera membru sira bele konsidera.
Antes ne’e, ME hetan alokasaun$114.943.286 iha OJE 2024, kompostu husi saláriu no vensimentu $87.431.460, bens servisu $439.854, transferénsia públiku $9.257.278, kapitál menór $1.818.693, kapitál dezenvolvimentu millaun $5.
Nune’e, ME nia ezekusaun atuál ba kompromisu $1.301.086,05 (1%), obrigasaun $4.479.292,49 (4%) no atuál $19.159.401.14 (17%).
Jornalista : Osória Marques
Editora : Julia Chatarina
