DILI, 12 agostu 2024 (TATOLI)—Sekretáriu Jerál Parlamentu Nasionál (PN), Edgar Sequeira Martins, hateten programa Parlamentu Joven ho objetivu atu lori estudante sira hodi hatene funsaun Deputadu nian iha órgaun soberania daruak ne’e.
Programa Parlamentu Foinsa’e ne’e kada tinan realiza no iha tinan ida-ne’e hala’o iha korrdenasaun hamutuk ho Ministériu Edukasaun.
“Programa ne’e lori joven estudante liuliu eskola sekundária sira iha territóriu mai PN hodi PN esplika ba estudante sira kona-ba lala’ok Deputadu sira-nian iha PN,” nia hateten ba jornalista sira, iha resintu Parlamentu Nasionál, segunda ne’e.
Nia hateten, loro n ida ohin, PN realiza briefing ba estudante na’in-42 ne’ebé sei partisipa programa Parlamentu Joven iha 22-23 agostu tinan ne’e.
Ba tinan ne’e, sei envolve de’it estudante sira iha eskola sekundária iha munisípiu Dili tanba haree ba kestaun tempu, nune’e iha tinan oin sei envolve husi estudante husi munisípiu hotu.
Durante iha atividade Parlamentu FJoven nian ne’e, estudante sira sei hala’o funsaun hanesan Deputadu ida.
“Iha 22-23 agostu sei halo programa Parlamentu Joven, ne’ebé alin estudante sira sei sai hanesan Deputadu. Sira sei halo diskusaun iha komisaun tuir guiaun ne’ebé mak iha, ne’ebé durante ne’e Deputadu sira aplika iha diskusaun komisaun nian,” nia dehan.
Iha 23 agostu, nia dehan, sei iha plenária no estudante sira sei sai hanesan mós Deputadu iha plenária hodi aprova ajenda plenária rasik, iha intervensaun no koloka kestaun sosiál ne’ebé identifika hafoin diskute no aprezenta solusaun.
Tan ne’e, nia hateten objetivu husi programa ne’e mak hahú ona introdús lala’ok iha PN ba estudante sira, tanba durante ne’e sira asiste liuhusi televizaun no dalaruma iha diálogu ho Deputadu sira, maibé ho programa ida-ne’e estudante sira ne’e mak sei sai Deputadu no akompaña sira hodi sira bele entende ona funsaun hanesan Deputadu.
Iha fatin hanesan, reprezentante manorin husi eskola sekundária Canosa, Julio Fernandes, hakarak hato’o agradeseimentu ba PN ne’ebé fó bibán ba foinsa’e timoroan atu bele uza oportunidade ne’e hodi kapasita aan aumenta koñesimentu iha PN.
Ba programa ne’e, husi eskola sekundária Canosa iha estudante na’in-tolu (3) mak partisipa iha programa Parlamentu Foinsa’e ne’e.
“Sira selesaun , ami profesór sira haree sira-nia kapasidade iha aula, depende sira-nia koñesimentu liuliu ko’alia hatene uitoan iha polítika, situasaun rai-laran, mak ami lori mai atu profunda liután koñesimentu no buka esperiénsia. Nune’e, iha future ne’e sira iha mehi, karik bele mai tuur iha fatin ne’e preparadu ona,” nia hateten.
Jornalista : Nelson de Sousa
Editór : Cancio Ximenes
