DILI, 12 agostu 2024 (TATOLI) – Prezidente Repúblika, José Ramos Horta, segunda ne’e, iha Palásiu Prezidensiál Dili fó pose ba Idelta Maria Rodriguês nu’udar Embaixadora Timor-Leste ba Nova Zelandia no António de Sá Benevides ba Embaixadór Timor-Leste iha Korea Súl.
Durante pose Xefe Estadu hateten, Idelta Maria Rodriguês iha esperiénsia boot iha dezenvolvimentu sosiál, igualdade jéneru, no polítika públika ba ninia kna’ar foun.
“Nia karreira inklui kargu nu’udar Feto dahuluk ba Sekretáriu Estadu ba Promosaun Igualdade no nu’udar Konselleira Prinsipál ba Vise-Primeiru Ministru,” tenik Prezidente Horta iha nia intervenssun bainhira fó pose ba Embaxadór na’in-rua ne’e iha Palásiu Prezidensiál Dili, segunda ne’e.
Enkuantu, António de Sá Benevides iha karreira distintu iha edukasaun, dezenvolvimentu internasionál, no servisu públiku, inklui kna’ar sira hanesan Membru Parlamentu Nasionál no Konselleiru Tékniku ba Ministériu Petróleu no Rekursu Natural.
“Nova Zelándia no Koreia-Súl sai ona parseiru importante iha dezenvolvimentu Timor-Leste nian dezde independénsia. Asisténsia kooperasaun anuál Nova Zelándia nian to’o besik milliaun $21, Nova Zelandia fó apoiu ba área sira hanesan edukasaun, agrikultura, polísia komunitária, turizmu, no produsaun kafé,” Horta dehan.
Alende ne’e, Koreia-Súl fó ona apoiu signifikativu liuhusi misaun manutensaun paz ONU nian, interkâmbiu diplomátiku, akordu komérsiu, no kooperasaun iha setór oin-oin, inklui programa KOICA no Sistema Autorizasaun Empregu.
“Ha’u iha konfiansa tomak katak Embaixadóra Rodriguês no Embaixadór Benevides sei reprezenta interese ita-nia nasaun nian no sei hametin liutan lasu amizade no kooperasaun entre Timor-Leste ho Nova Zelándia no Koreia-Súl respetivamente,” Horta tenik.
Iha fatin hanesan, Embaixadora Timor-Leste ba Nova Zelandia, Idelta Maria Rodriguês agradese ba Maromak no konfiansa hUsi Prezidente Repúblika, tanba nomea-nia ba Embaixadora Timor-Leste iha Nova Zelandia.
“Durante iha ne’eba ha’u sei kontinua de’it servisu saida mak Embaixadór sesante halo ona atu hametin liutan kooperasaun ne’ebé mak iha ona entre ita ho Nova Zelandia,” nia kompromete.
Enkuantu, Embaixadór António de Sá Benevides, afirma sei hasoru malu ho Prezidente Repúblika hodi simu orientasaun antes hala’o misaun iha Korea Súl.
“Ita hatene katak ita nia relasaun ho Korea di’ak tebes, ha’u sei kontinua de’it saida mak antes ne’e iha ona, liuliu hametin kooperasaun oinsa mantein haruka ita nia traballadór sira ba servisu iha Korea, hametin mós ita nia kooperasaun iha área edukasaun no seluktan,” nia afirma.
Konstituisaun Repúblika Demokrátika Timor-Leste atribui ba Prezidente Repúblika kona-ba kompeténsia iha ámbitu relasaun internasionál atu nomeia no demite embaixadór sira, reprezentante permanente sira no enviadu estraordináriu sira, tuir proposta husi Governu, tuir buat ne’ebé hakerek iha nia artigu 87, alínea b).
Jornalista: Hortencio Sanchez
Editór: Florencio Miranda Ximenes
