DILI, 13 agostu 2024 (TATOLI) – Delegasaun St. John of God, International Health ne’ebé lidera husi Doutór Lorenço Camacho, tersa ne’e, hasoru malu ho Prezidente Repúblika, José Ramos Horta, hodi ko’alia kona-ba rezultadu servisu ne’ebé durante ne’e koopera ho Governu Timor-Leste liuliu kona-ba kestaun saúde.
“Objetivu enkontru ho Prezidente Repúblika informa servisu parseria hosi São João de Deus Australia ninian ne’ebé servisu ho Governu Timor-Leste durante tinan 20. Entaun ohin ami diskute oituan kona-ba ami nia fokus ne’e ba Hospitál Nasionál Guidu Valadares (HNGV) atu servisu hamutuk hadi’a kuidadu saúde ne’ebé foku ba pasiente iha ita nia sistema saúde,” Doutór Lorenço Camacho hateten ba jornalista sira hafoin remata enkontru ho Xefe Estadu.
Nia dehan, iha Austrália São João de Deus iha esperiénsia no jere Ospitál privadu hamutuk 27, nune’e Ospitál Governu nian hamutuk tolu iha Austrália.
“Servisu ho HNGV ne’e la’o tiha ona tinan 20, programa koñesidu loos mak programa dezenvolvimentu enfarmajen, nune’e mós programa lideransa no selu-seluk tan. Ami iha ne’e atu haree oinsá progresu ne’ebé ita atinje ona no apoiu ba HNGV ninian, no ami sei servisu hamutuk atu haree rezultadu di’ak iha futuru,” nia dehan.
Nia hatutan, alende HNGV, sira nia parte servisu hamutuk mós ho Oospitál Referál Maubessi.
“Ami orgullu tebes hasoru ita nia Prezidente Repúblika atu hatene nia vizaun kona-ba sistema saúde, ami iha komitmentu nafatin atu kontinua, apoiu Timor-Leste iha área saúde,” nia tenik.
Tuir nia haree, dezafiu ne’ebé HNGV hasoru mak oinsá pasiente sentru kuidadu servisu saúde, HNGV iha mudansa la’o uitoan-uitoan mudansa di’ak iha kapasidade enfermeiru sira atu bele oferese kuidadu saúde ba pasiente sira.
Durante enkontru, Prezidente Repúblika husu São João de Deus Austrália kontinua mantein kualidade servisu apoiu ba pasiente sira, maibé importante loos mak oinsá halo manutensaun ba ekipamentu sira iha Ospital sira, tanba se laiha manutensaun di’ak labele oferese kualidade tratamentu ba pasiente sira.
Jornalista: Hortencio Sanchez
Editor: Florencio Miranda Ximenes
