VIQUEQUE, 12 agustu 2024 (TATOLI)- Estadu no família, segunda ne’e, haloot ona saudozu João Soares Guterres “Ihat Mota”, iha semitériu públiku, iha suku Uaitame, Postu Administrativu Uatulari, munisípiu Viqueque.
Saudozu Ihat Mota hakotu iis bainhira hetan soke iha área Lanud Baucau ne’ebé akontese iha loron kuarta (07/08), maizumenus tuku 11:15, dader ho motorizada, ho nia xapa matrįkula H. 8760.
Iha serimónia funebre, Prezidente Konsellu Kombatente Libertasaun Nasionál (CCLN), Munisípiu Viqueque, Adriano Camara “Lentil”, sente triste tanba lakon ema laran di’ak iha postu administrativu Uatulari.
“Maibé, ohin loron nia (Ihat Mota) hakotu i’is no lakon iha ita-nian sorin no lakon iha veteranu hotu nian leet. Sentidu ida-ne’e ita tenke sente iha postu Uatulari liuliu zona Umusege imi lakon imi-nia ema di’ak ida”, Adriano Camra “Lentil”, hateten iha serimónia funbre, iha rezidénsia saudozu Ihat Mota, aldeia Tatilari, suku Matahoi, ohin.
Nia hatutan: “Ba kombatente hot-hotu ita-nia vida mak ne’e, uluk ita iha rezisténsia ita simu terus oi-oin tanba situasaun funu, situasaun inimigu nian. Ohin loron ita iha ona páz nian laran no situasaun hakmatek ita simu tan terus, ita veteranu ne’e hetan sofrementu dobru, independénsia mós ita terus, funu mós ita terus ba inimigu, terus mós ba família. Tanba ita sira-ne’ebé ka’er ona kilat, ita sira-ne’ebé ruin no raan iha ita-nia leten sempre simu konsekuensia oi-oin”.
Prezidente CCLN ne’e konta iha fulan-Setembru tinan 1981 saúdozu rasik nia família sira iha Uatulari maka halo traisaun ba saúdozu hodi imigu sira kaputura saudozu.
“Buat ne’ebé akontese traisaun ne’e ha’u lakohi subar ida-ne’e tanba ida-ne’e ha’u-nia dever hodi ko’alia sai família rasik husi saudozu Ihat Mota. Ita veteranu maka na’in ba ukun an no rin ba nasaun”, nia haktuir.
Biografia Saudozu Ihat Mota
Saúdozu João Soares Guterres “Ihat Mota” moris iha loron 10 fulan-Maiu 1958, oan husi aman Napleão Pinto, inan Isabel Pinto, husi uma Lisan Loidiki. Saúdozo João Soares Guterres “ihat Mota” nian maun alin no feton na’an hamutuk nain sia (9) kompostu mane na’in-aat (4) no Feto nain Lima (5).
Durante, Saudozu nu’udar oan mane ne’ebé sempre leal ba família no hola pozisaun nu;udar oan mane ba familia Umea Lisan Loidiki. Estadu Sivil, Saudozu João Soares Guterres “Ihat Mota” forma família dahuluk ho Marta Pinto husi Uma Lisan Gada lale Uamata Isi iha tinan 1977, sira nain rua kuos oan hamutuk nain-lima (5), kompostu husu feto nain-haat (4) no mane ida (1).
Depois ida-ne’e saúdozu Ihat Mota kontinua forma familia daruak ho feen Etelvina Lourdes iha tinan 2003 husi uma lisan Gada Lale Uamata Isi, sira nain rua kous oan hamutuk na’in-haat (4) mak hanesan feto nain-rua (2) no mane nain-rua.
Saudozu Ihat Mota hahú nian estudu iha eskola Pre-Primária Uatulari iha tinan 1966, iha tinan 1967 eskola iha Primária eskola Uatulari, iha tinan 1968, saudozu eskola segunda klase iha eskola Uatulari, iha tinan 1969 saúdozu ba terseira klase iha eskola Uatulari, iha tinan 1970 sai kuarta klase iha eskola Uatulari, iha tinan 1971 to’o 1974 eskola privada Xavier Lecidere Dili, tanba ekonómia família nian la favorese ba saúdozu deside-an hodi servisu.
Saudozu nia kontribuisaun ba luta Libertasaun Nasionál ho dahuluk nu’udar militante ASDT/FRETILIN tinan 1974 hodi defende prinsipiu independénsia povu Maubere.
Nune’e iha tinan 1975, saudozu hahú tama iha forsa militár FALINTIL hanesan soldadu hamutuk ho komandante Mauk-Moruk to’o iha loron 7 Dezembru tinan 1975.
Iha loron 1 Maiu tinan 1976, Saudozu hanesan Komandante Sesaun iha forsa setór hamutuk ho nian Komandante Kompañia Kalo Wai no Dai-Tula. Iha loron 1 Marsu tinan 1977 to’o 31 Dezembru 1978 hanesan Komandante Pelotaun iha forsa setór ho nian Komandante kompania Loi-Sibe iha faze de Gerillia.
Iha loron 1 Janeiru 1979 to’o 2 Marsu tinan 1981, hanesan Komandante unidade iha Segundu Unidade Guerilla hamutuk ho Komandante Kina Do’ome.
Iha loron 3 Marsu 1981 to’o loron 19 Setembru tinan 1981 hanesan Komandante Pelotaun destaka ho Komandante Piter Braga. Iha loron 9 Setembru tinan 1981 tuir ordém Komandu destakamentu saudozu Ihat Mota mak direta hala’o enkontru ho membru kaixa kladestina iha Uatulari Vila, mak hetan kapturasaun husi forsa Indonézia HANSIP Uatulari, iha fatin Kai-lois no kontinua entrega ba iha KORAMIL 03 Uatulari ho nian komandante Dulami no kastigu iha KORAMIL Uatulari to’o loron 30 Marsu tinan 1982.
Milítar uza nian servisu hamutuk ho forsa rate ho komandante kompañia rate José Fernandes, maibé saúdozu ho prinsipiu luta libertasaun nasionál, mak hala’o nafatin servisu klandestina.
Nune’e saúdozu hamutuk fali ho responsavél ligasaun frente klandestina ho Martinho Soares Purnama, Tomas Soares da Silva “Kaidoe” iha Uatolari Vila hodi habelar liután servisu klandestina liuhusi kaixa Mota Livre Maravia, Ramelau liu fatu iha Loilete Olakesi, liga Vibaqueque Miguel Rai dook iha Viqueque.
Iha Dezembru 1981 to’o loron 29 Marsu tinan 1982, saudozu nomeadu husi reponsevél klandestina nu’udar koordenadór orgaun lima (5) iha Uatolari Vila Regiu Bivake.
Ho misaun orgaun foun saudozu Ihat Mota ho responsavél Klandestina loke Kaixa foun iha Miabuti, Uatulari ho planu halo asaltu ba pontu estratéjiku inimigu nian iha Uatulari. Iha loron 3 fulan-Abríl tinan 1982 Kasi Satu no DANREM lori saudozu ho nian maluk dadur Valente Ribeiro ba kastigu iha milítari Indonézia 745 iha Fatumaka Baucau to’o loron 3 Abríl 1982.
Iha loron 1 Abríl tinan 1982, milítar Indonézia 745 lori saudozu ba kastigu iha Komandu setór Baucau ne’ebé komanda husi Adam Damiri to’o loron 30 Abríl tinan 1982.
Iha loron 1 Marsu 1982, forsa Indonézia husi komandu setór Baucau lori saudozu ba kastigu fali ho forsa Indonézia batallaun 742 iha suku Samalari, postu Administrativu Laga munisípiu Baucau to’o loron 12 Janeiru 1983.
Iha loron 13 Janeiru 1983, forsa Indonézia Kasi Satu KOREM lori Saúdozu Ihat Mota ba kastigu fali iha Farol Dili hamutuk Marito Reis to’o Novembru loron 1990 mak saúdozu livre inkondisional. Iha fulan-Novembru tinan 1990 mesmu livre inkondisional, maibé saúdozu kontinua hala’o ligasaun klandistina ho liurai Tasi to’o loron 25 Marsu 1992.
Iha loron 25 Marsu 1992, to’o 30 Agostu 1999 iha frente klandestina sai hanesan Asistente Polítika Rejiaun CNRM, ODIR, CNRT, ho komandante Rejiaun II Sabika Besi Kulit no Liurai. Saudozo Ihat Mota hetan rekonesementu husi estadu Timor Leste ho medalla Ordém Nicolau Lobato Grau 2.
Faze ukun-an saúdozu servisu nu’udar Mekanika iha Ofisina Milítar Portugués iha balide Dili to’o iha krize 2006 saudozu, nune’e saudozu deside fila mai ba moris fatin Uatulari iha Aldeia Tatilari, Suku Matahoi hanesan Dezempregu.
Iha tinan 2012 hahú mosu hanoin husi Komandante Xefe Kay Rala Xanana Gusmão, hala’o enkontru iha eskuadra Polísia Nasionál Timor Leste (PNTL) postu Administrativu Uatulari ho liafuan, “imi Kombatente Libertasaun Nasionál hela Halo Buat ruma. Ho hanoin ida-ne’e Kombatente Libertasaun Nasionál iha Uatulari komesa kria enkontru hodi harii komisaun Organizadóra Rekolla Restu Mortais iha tinan 2012, Saudozu asume kargu hanesan Xefe sesaun indentifikasaun.
Iha tinan 2013, CORRM kontinua hari ekipa Narrativa atu hakerek istoria Luta Libertasaun Uatulari oan sira nian, Saudozu assume kargu hanesan Koordenadór ekipa Narrativa to’o saudozu fila ba mundu seluk.
Jornalista : Vitorino Lopes da Costa
Editór : Florencio Miranda Ximenes
