DILI, 13 agostu 2024 (TATOLI)—Vise Ministru ba asuntu Parlamentár, Adérito Hugo da Costa, hateten Governu Konstitusionál da-sia komprometidu finaliza validasaun dadus veteranu rejistadu iha 2009, nune’e iha tinan oin (2025) bele hetan ona direitu ba pagamentu.
Notísia Relevante: Governu sei finaliza validasaun dadus veteranu rejistadu 2009 iha tinan ne’e
‘’Hakarak adianta katak Governu Konsttitusionál da-sia iha Orsamentu Jerál Estadu (OJE) 2024 la konsege prevee orsamentu atu halo pagamentu ba verfikasaun dadus tinan 2009 nian, maibé komprometidu atu finaliza tiha tanba validasaun seidauk kompleta ba 2009 nian. Tinan ida-ne’e serbisu la’o makaas ba validasaun, nune’e kompleta tiha ona númeru ida loos, hodi bele halo ona kálkulu ba orsamentu 2025 nian iha Ministériu Asuntu Kombante Libertasaun Nasionál (MAKLN), nune’e tinan oin bele halo ona pagamentu ba benefisáriu sira iha direitu ona atu hetan,” nia hateten hodi responde preokupasaun Deputadu sira-nian iha reuniaun plenária komisaun permanente iha Parlamentu Nasionál (PN), tersa ne’e.
Nune’e, Governante ne’e dehan daudaun Governu sentrál hala’o Komite Revizaun Orsamentu Polítika (KROP) kada liña ministériu hahú horisehik lidera direta husi Primeiru-Ministru no ministériu sira tenke ba ona aprezenta sira-nia planu orsamentu iha tinan 2025.
Ne’ebé, MAKLN tenke ba ona númeru ida kálkulu orsamentu hira mak prevee pagamentu ba verifikasaun kombante iha tinan 2009 nian.
Iha parte seluk, Vise Ministru ne’e sei envia preokupasaun husi membru PN kona-ba validasaun akta ba MAKLN hodi bele fó resposta.
Entretantu, iha reuniaun plenária ne’e, Deputadu PLP, Helder Freitas “Kamarudi’’, hato’o preokupasaun husi veteranu sira iha munisípiu Baucau kona-ba aprovasaun akta validasaun kombante sira ba rejistu daruak iha tinan 2009 hodi husu MALKN atu atensaun.
Jornalista : Nelson de Sousa
Editór : Cancio Ximenes
