DILI, 13 agostu 2024 (TATOLI) – Diretora Ezekutiva Fundausaun Alola, Maria Imaculada Guterres, alerta katak susubeen formula ne’ebé fó ba bebé sei la fó benefísiu ba bebé nia saúde maibé sei hamosu risku ba bebé bainhira atinje idade adultu.
“Risku husi susubeen formula ba labarik mak hanesan labarik sira sei afeta moras la hada’et sira iha idade adultu hanesan, moras tensaun, obesidade (todan aas), raan midar no moras seluk tán”, Maria Imaculada Guterres relata ba jornalista sira iha nia kna’ar fatin Mascarinhas, ohin.
Maria esplika, susubeen inan nian ajuda prevene má nutrisaun labarik sira nian, aleinde ne’e, proteje hasoru moras komun infánsia nian hanesan diarea no moras seluk tán.
Diretora esplika, susubeen inan importante tebes tanba seguru ba bebé sira no bele tulun bebé hadook hosi moras infesaun oioin tanba susubeen inan nian riku ho nutrisaun oioin atu bele priénse nesesidade nutrisaun bebé nian no kompara ho susubeen rahun ne’ebé faan, bebé balun la toman ho nutriente iha susubeen rahun sira ne’e bele halo alerjia no infesaun ba bebé.
“Sukat susubeen rahun laloos bele halo bebé hetan moras infesaun, nutrisaun ne’ebé mak la kompletu bele hamosu moras seluk ba bebé bainhira uza susubeen rahun hanesan, tensaun alta bainhira labarik ne’e ba ona to’o idade adultu, obesidade, raan midar no moras sira seluk tán”, nia esplika.
Nia informa, susubeen inan nakonu ho proteina hodi bele ajuda haboot bebé tuir nia tempu. Tanba ne’e bebé sira moris mai importante atu hetan susubeen kinur no kinur ne’e rasik nakonu ho vitamina A ne’ebé mak hadook bebé hosi infesaun oioin nia mós iha nutrisaun sira seluk”, nia dehan.
tuir nia, susubeen inan nian hanesan imunizasaun dahuluk atu tahan bebé nia isin kontra moras oioin ne’ebé haleu nia, tanba hahan ne’ebé seguru liu ba bebé mak inan nia susubeen, di’ak ba bebé nia estomugu no tuir bebé nia idade.
“Halo akonsellamentu ba inan isin rua, ida-ne’e ita hanorin kona-ba importante fó susu-been inan ba bebé no mós importante fó susubeen eskluzivu hosi bebé moris mai to’o fulan neen katak laiha hemu no han seluk fó ba bebé, maibé inan nia susubeen loos de’it hosi bebé moris to’o fulan-neen no to’o ona fulan neen hakarak ka lakohi bebé tenke han ka hemu mós hahan seluk, maibé kontinua fó susubeen inan nian to’o tinan rua ka liu”, nia haktuir.
nia subliña, ekipa Fundasaun Alola servisu iha óspital nasionál, Oe-cusse, Baucau, Maubisse sira kontinua fahe informasaun no fornese akonsellamentu ba inan sira ne’ebé mai partu no inan isin rua no mós ba família pasiente kona-ba importante hosi susubeen inan no mós importante hosi fó susu-been ba bebé hafoin bebé moris.
“Iha ne’ebá ami-nia pesoál sira servisu diretamente ho parteira sira ho ekipa profisionál saúde sira iha ospitál refere atu apoiu mós kontatu kulit ho kulit bebé ho nia inan, aleinde fó akonsellamentu, edukasaun, korajen ba inan sira ne’ebé foin partu atu fó susu kedas ba bebé”, nia konklui.
Jornalista : Felicidade Ximenes
Editór : Zezito Silva
