DILI, 13 agostu 2024 (TATOLI)-Deputadu KHUNTO, Antonio Verdiál de Sousa, husu Ministériu Edukasaun (ME) atu atensaun ba kondisaun eskola Ensinu Báziku Filiál (EBF) Manukoliria iha postu administrative Letefoho, munisípiu Ermera.
“Iha Ermeraeskola primaria ida harii dezde Governu tranzitóriu ho naran eskola primária Manukoliria, no agora daudaun muda naran Ensinu Báziku Filiál Manukoliria, ne´ebe lokaliza iha aldeia Baulisuria no Manukoliria, to´o ohin loron Governu ladauk kria kondisaun hanesan eskola sira seluk no enfrenta mós problema menus profesór,” nia hato’o iha reuniaun plenaria komisaun permanente iha Parlamentu Nasionál (PN), tersa ne’e.
Nia dehan, iha eskola refere manorin hamutuk na’in-haat de’it, iha na’in-rua permanente no rua seluk sei kontratadu ho nune´e prezudika tebes prosesu aprendijazenm ba estudante sira labele ultrapasa to´o sestu anu (6 ano). Bainhira estudante sira pasa husi kintu anu (5 ano) tenke tranfere ba Ensinu Báziku Sentrál Hatu-Hei ne´ebé distánsia kuaze kilometru neen no ultrapassa mós mota Pae-Geo ne´ebé boot bainhira tempu udan pasiénsia estudante tenke falta eskola.
Nia husu ME atu bele tau atensaun no atu halo alargamentu ba eskola hirak ne´ebé ho distánsia dook no aumenta manorin hodi hatan ba estudante sira-nian iha oportunidade ba estuda, hodi nune´e povu liuliu eskola iha área remota.
Vise Ministru ba asuntu Parlamentár, Adérito Hugo da Costa, hateten Governu da-sia komprometidu iha mandatu rezolve problema edukasaun ne’ebé iha no mandatu Governu ida-ne’e foin tinan ida, nune’e sei iha tinan haat atu bele rezolve.
Hanesan foin tinan ida Ministériu Edukasaun liuhusi bolsa kandidatu faze dahuluk termina ona no koloka ona manorin sira ba eskola sira iha territóriu, no agora kontinua ho bolsa kandidatu faze daruak hodi bele rezolve menus manorin iha eskola sira iha territóriu no hasa’e liután kualidade edukasaun.
Jornalista : Nelson de Sousa
Editór : Cancio Ximenes
