DILI, 13 agostu 2024 (TATOLI) – Ministru Defeza Kontra Almirante, Donaciano Costa Gomes, Pedro ‘Klamar Fuik’, prioriza infraestrutura no bem estar militár nian.
“F-FDTL iha tinan oin, ita kontinua tau prioridade ba dezenvolvimentu forsa armada nian. Militar sira tenke iha kondisaun infraestrutura ne’ebé mak adekuada, tanba tinan rua nulu ita dezenvolve ita-nia forsa husi kuantidade efetivu militár. Maibé depois sira-nia hela fatin laiha no sira fardamentu mós sei mukit, tipu armamentu mós adekuadu. Kondisaun hothotu hanesan militár no kondisaun sosiál no saúde ba militár seidauk adekuadu, tinan oin, polítikamente ita tenke fó solusaun ba kestaun sira ne’e”, Klamar Fuik, hateten ba jornalista sira hafoin vizita Kurtel Polísia Militár Kintál Bo’ot, tersa, ohin.
Governante ne’e hateten, orsamentu ba Ministériu Defeza no FALINTIL-Forsa Defeza Timor-Leste (F-FDTL) ba tinan oin seidauk iha definitiva tanba sei iha hela prosesu diskusaun.
“Ha’u seidauk adianta buat ida tanba husi Ministériu Defeza no F-FDTL sei diskute molok lori ba hodi debate iha komisaun revizaun ba orsamentu iha 16 agostu”, nia adianta.
Klamar Fuik hateten, infraestrutura militár mak hodi harii kazerna ba militár sira iha Beduku no Damalara (Bobonaro) inklui iha área Moleana (Bobonaro).
“Laos ba infraestrutura sira ne’e de’it, maibé tinan oin, ita sei halo mós uma ba militár sira iha Suai iha Ainaro Kasa, Same inklui Manatutu”, nia konklui.
Jornalista: Natalino Costa
Editór : Zezito Silva
