DILI, 13 agostu 2024 (TATOLI)–Ministériu Ensinu Superiór Siénsia no Kultura (MESSK) hetan ona tetu hamutuk millaun $9,1 iha Orsamentu Jerál Estadu (OJE) 2025, nune’e ekipa halo ona aprezentasaun ba Komité Revizaun Orsamentu.
“Ha’u lori tetu ba aprezenta ba Komité maibé seidauk iha desizaun finál atu ko’alia filafali maibé ami fiar katak sei halo desizaun ba ida-ne’e,” Ministru Ensinu Superiór Siénsia no Kultura, José Honório da Costa Pereira Jerónimo, hateten ba Agência Tatoli, iha UNTL, tersa ne’e.
MESSK tau prioridade ba dezenvolvimentu iha Institutu Ensinu Superiór (IES) sira.
“Prioridade ba MESSK kontinua ba apoiu ensinu superiór privadu sira no ita iha ona lei baze ensinu superiór ne’ebé Prezidente Repúblika promulga ona, entaun hahú ona ano zero ba lian portugés iha ensinu superiór hotu-hotu. Osan ne’e ita tau hodi ajuda IES ba buat tolu hanesan estudante, profesór no lingua,” nia akresenta.
Notísia relevante : Bolseiru bolsa hakbiit husi IES 17 la konkorda desizaun hamosu bolsa parsiál
Aleinde ne’e, iha mós orsamentu adisionál ba MESSK hamutuk millaun $2,5 hodi kontinua selu reprezentante ministériu iha rai-li’ur.
“Ne’ebé importate tebes, tanba ne’e ami tau osan mós. Nune’e, ita tau osan $900.000,” Ministru tenik.
MESSK nia ezekusaun orsamentu to’o jullu tinan ne’e atinje ona 77%, nune’e Ministru garante katak to’o tinan ne’e nia rohan ezekusaun bele di’ak liután.
“Ezekuta ona ba saláriu no vensimentu, kapitál menór, kapitál dezenvolvimentu, tranferénsia públika hamutuk ami to’o ona 77% iha fulan-jullu. Ministériu garante katak to’o tinan 2024 nia rohan ne’e ezekusaun ramata bele atinje 97% to’o 98% hanesan ne’e,” governante ne’e otimista.
Jornalista : Osória Marques
Editora : Julia Chatarina
