OÉ-CUSSE, 13 Agostu 2024 (TATOLI) – Diresaun-Jerál Servisu Migrasaun, Ministériu Interiór (MI), sensibiliza lei númeru 10/2021, loron 16 Juñu, kona-ba primeira alterasaun lei númeru 11/2017, loron 24 Maiu, Lei Migrasaun no Azilu ho matéria prinsipál haat ba entidade sira iha Rejiaun Administrativa Espesiál Oé-Cusse Ambeno (RAOEA).
Adjuntu Diretór-Jerál Servisu Migrasaun, Juvinal Castelo, informa matéria haat ne’e mak Lei Migrasaun no Azilu, vistu, prosedimentu tama no sai iha pontu entrada no krime imigrasaun, liuliu kona-ba violasaun vistu, kaben mistu no tráfiku umanu.
Alvu ba diseminasaun ne’e ba autoridade komunitária, PNTL liuliu Ofisiál Polísia Suku, autoridade relijioza no sosiedade sivíl sira atu apoia halo prevensaun ba sidadaun estranjeiru sira ne’ebé tama iha territóriu, espesialmente iha RAEOA.
“Sensibilizasaun ne’e foin dahuluk hala’o iha Oé-Cusse, maibé tinan kotuk ami hala’o iha munisipíu sia iha perte leste no rai-klaran no iha tinan ne’e ami halo iha munisipíu lima, abertura iha RAEOA. Semana oin ami sei halo iha Bobonaro, Liquicá no Ermera depois vizita Papa mak enserra iha Covalima”, nia adianta iha ámbitu divulgasaun lei ne’e iha otél Ambeno, ohin.
Juvinal Castelo espera katak ba oin parte autoridade sira-ne’ebé partisipa iha eventu ne’e sei kolabora ho Servisu Migrasaun kona-ba sidadaun estranjeiru ruma movimenta iha área juridisaun Oé-Cusse nian.
Sekretáriu Rejionál ba Asuntu Administrasaun, André Lao, reprezenta Prezidente Autoridade RAEOA, agradese tanba programa ne’e importante liga ba vizita Santo Papa Fransisco mai Timor-Leste, nune’e persiza kolaborasaun husi entidade hotu.
“Ita tenke koopera ho komunidade, autoridade lokál sira, la’ós buat hotu ita entrega hotu ba PNTL, maibé ita-nia kontribuisaun importante”, nia katak.
Komandante PNTL Oé-Cusse, Superintendente Polísia, Nicolau Francelino da Costa, dehan liuhusi atividade ne’e bele hasa’e koñesimentu entidade hotu iha Oé-Cusse. “Hanesan autoridade seguransa iha Oé-Cusse ha’u kontente, tanba sosializasaun bele hasa’e konxiénsia ema hotu atu kolabora malu, nune’e ita bele tau-matan ba ita-nia rai, liuliu ema foun ruma kuandu tama ita persiza hatene”, nia salienta.
Notísia relevante: PN aprova ona alterasaun dahuluk ba lei migrasaun-azilu
Tuir dadús, iha 2024, Diresaun-Jerál Servisu Migrasaun konsege rejista sidadaun estranjeiru ne’ebé serbisu iha empreza Waskita Karya hamutuk 37 no prosesa ona tuir Lei Azilu Timor-Leste nian.
Hola parte iha sensibilizasaun ne’e Komando Polísia Nasionál Timor-Leste, komposta husi Unidade Polísia Fronteira (UPF), Unidade Polísia Marítima (UPM) no F-FDTL, jestór sub-rejiaun haat no xefe suku sira.
Jornalista: Abílio Elo Nini
Editóra: Maria Auxiliadora
