DILI, 14 agostu 2024 (TATOLI) – Prezidente Repúblika, José Ramos Horta, realiza eventu prestijiozu Sci-Tech EXPO 2024, durante loron tolu hahú 14-16 Agostu, iha Salaun Nobre Ministériu Negósiu Estranjeiru no Kooperasaun (MNEK) no Atividade ne’e partisipa husi Distintu Laureadu Nobel ba Pás sira iha mundu.
Sci-Tech EXPO 2024, ho tema “Siénsia, Teknolojia & Inovasaun: Dalan ba Transformasaun no Dezenvolvimentu Sustentável iha Timor-Leste,” inauguradu husi Prezidente Ramos Horta, halibur hamutuk mais brillante sira mundu nian hodi fahe sira-nia esperiénsia no inspira juventude Timoroan sira.
Eventu prinsipál sira iha expozisaun ne’e inklui, serimónia abertura ofisiál no inaugurasaun ezibisaun fotográfika husi Prezidente Ramos Horta, Palestra kona-ba teknolojia saúde móvel, telemedicina, no teknolojia edukasionál, Painel diskusaun kona-ba hametin inovasaun iha Timor-Leste, no sesaun pergunta no resposta permite estudante no profisionál Timoroan sira atu envolve diretamente ho laureadu sira.
Konvidadu Distintu sira ba Sci-Tech EXPO 2024 inklui, Profesór Konstantin Novoselov, Laureadu Nobel iha Fízika, Profesór Martin Chalfie, Laureadu Nobel iha Kímika, Profesór Shwetak Patel, MacArthur Fellow no vensedór ACM Prize iha Komputasaun, no Profesór Eric Brewer, ACM Fellow no pioneru iha komputasaun nuvem.
Aprezentasaun no diskusaun sira moderadu hosi Rui Paulo de Jesus, Doutor, no Abel Pires, Eis-Deputadu no Eis-Ministru Obras Públika.
“Eventu ne’e reprezenta pasu signifikadu ida iha Timor-Leste nia viajen ba avansu sientífiku no teknolójiku,” Prezidente Ramos Horta hateten iha nia intervensaun bainhira loke atividade ne’e.
PR Horta dehan tan, “Lori hanoin murak hosi matenek na’in sira ne’e mai ita-nia rai, ita-nia objetivu mak atu inspira ita-nia foin-sa’e sira, promove inovasaun, no prepara dalan ba kresimentu iha Timor-Leste.”
Sci-Tech EXPO 2024 nu’udar parte ida husi Programa Promosaun turizmu Timor-Leste nian iha tinan 2024 ne’ebé luan liu, hatudu nasaun nia kompromisu ba progresu iha setór oioin.
Horta hatutan, Sci-Tech EXPO 2024 loke ba públiku no sei aprezenta série atividade altu nível sira hosi fulan-agostu to’o fulan-outubru 2024.
Jornalista: Hortencio Sanchez
Editór: Florencio Miranda Ximenes
