DILI, 14 agostu 2024 (TATOLI)–Institutu Nasionál Kombate HIV/SIDA (INCIDA, sigla portugés), kuarta ne’e, halo sensibilizasaun ba estudante husi Eskola Ensinu Sekundáriu Jerál (ESJ) Fitun Naroman Timor-Lorosa’e (FINANTIL) kona-ba moras HIV/SIDA.
“Dadus husi Ministériu Saúde hatudu katak ema husi idade 15 to’o 24 mak afetadu liu ba moras HIV/SIDA, entaun ita hakarak sensibiliza informasaun ne’e ba ita-nia alin estudante sira atu hasa’e sira-nia koñesimentu uitoan, nune’e sira bele prevene-an husi moras ne’e hodi redús númeru ema afetadu husi moras ne’ebé kada tinan sempre aumenta,” Diretór Promosaun, Prevensaun no Komunikasaun, Silvestre da Costa Sarmento, informa iha Eskola FINANTIL, Ai-mutin.
Nia konsidera, liuhusi sensibilizasaun ne’e estudante sira bele rona didi’ak no tau iha prátika, nune’e garante katak neineik ba beibeik númeru afetadu ba moras hada’et ne’e sei menus.
“Ita rejista hahú husi tinan 2023 to’o mai marsu 2024 iha ema hamutuk 2.042 afetadu ba moras HIV/SIDA, entaun espera katak ita halo sensibilizasaun ba ita-nia joven sira liu-liu estudante ensinu sekundáriu sira atu apreende no iha koñesimentu hodi prevene-an, família no nasaun ne’e husi moras referidu. Ita espera liután katak husi sensibilizasaun ne’e mak sira tau iha prátika ita garante neineik no beibeik ita sei redús númeru afetadu,” nia akresenta.
Notísia relevante : Governu Kontinua Sensibiliza HIV SIDA ba Estudante
Husi númeru rejistadu 2.042 ne’e, idade ne’ebé afetadu liu ba moras HIV/SIDA hahú husi 25 to’o 44, tuir mai idade 15-24, no tuir tan mak 45 ba leten no ikus liu kiikoan sira ho idade 5 mai kraik.
Iha biban hanesan, Diretór Eskola ESJ FINANTIL, Aniceto Barlelo, hateten, difísil atu hetan tratamentu moras HIV/SIDA, tanba ne’e importante tebes ba iha estudante sira atu hatene nune’e sira bele prevene-an husi moras ne’e.
“Depois moras ne’e mós da’et ba ema ho lalais liuhusi relasaun sexuál, entaun ita-nia Governu liuhusi Ministériu Saúde mai halo sensibilizasaun ba estudante sira oinsá atu kuidadu sira-nia an husi ransu livre no prevene-an husi moras ne’e, ne’ebé ita agradese ba parte ministériu tanba nafatin preokupa ba ita-nia alin sira hodi oinsá prevene-an husi ransu livre no bele redús moras HIV/SIDA ne’e,” nia tenik.
Nune’e, Diretór eskola espera, informasaun ne’ebé estudante sira hetan nu’udár bukae ida no bele tau iha kakutak no prátika iha moris loron-loron ho konsiénsia atu salva-an, família no nasaun.
Reprezentante estudante, Maria Soares, konsidera, atividade ne’e di’ak no importante tebes ba joven sira, liu-liu estudante ensinu sekundáriu sira tanba husi númeru ne’ebé Ministériu Saúde rejista katak ema ne’ebé afetadu ba moras ne’e maioria joven husi idade 15 ba leten.
“Husi sensibilizasaun ne’e ami agradese no ami sei tau informasaun sira iha prátika hodi evita-an husi ransu livre liu-liu halo relasaun sexuál ho livre,” nia katak.
Eskola ESJ FINANTIL daudaun iha estudante hamutuk 1.700 ho nia saladeaula 18, no profesór hamutuk 67.
Jornalista : Osória Marques
Editora : Julia Chatarina
