DILI, 14 agostu 2024 (TATOLI)–Ministru Ensinu Superior Siénsia no Kultura (MESSK), José Honório da Costa Pereira Jerónimo, prefere Universidade da Paz (UNPAZ) no Universidade Katólika Timorense (UCT, sigla portugés) haree uluk rekursu umanu molok atu loke klase internasionál.
“UNPAZ no UCT atu loke klase internasionál iha fulan-setembru ne’e iha profesór hira, to’o 10 ka lae, se la to’o tenke haree halo didi’ak,” Ministru hateten iha UNTL, Caicoli, kuarta ne’e.
Ministru dehan, nia parte to’o agora seidauk haree dokumentu legál ruma kona-ba asuntu ne’e.
“Eskola internationál ne’e loke sira serbisu ho se lai, sira diskute lai, tenke envolve mós MESSK no haree lai rekezitu, tanba ami iha rekezitu 10 ne’ebé sira tenke prense bainhira atu loke kursu ruma, ha’u rona de’it maibé seidauk haree dokumentu ofisiál ruma husi sira,” nia akresenta.
Rekezitu ne’ebé kada universidade presiza prense bainhira atu loke kursu ruma maka hanesan, misaun no vizaun instituisaun ninia, estrutura governasaun, jestaun administrativu, programa akadémiku, kurríkulu, pesoál hanorin sira, rekursu aprendizajen (biblioteka, laboratóriu no teknolojia edukasaun) propriedade no rekursu finanseiru.
Notísia relevante : UNPAZ-UCT loke klase internasionál iha área medisina jerál iha setembru
Iha sorin seluk, Reitór UNPAZ, Adolmando Amaral, hateten, ekipa husi UNPAZ no UCT antes ne’e aprezenta ona programa ba Governu.
“Kona-ba klase internasionál ne’e, UNPAZ no UCT serbisu hamutuk ho Índomert Education husi Índia, kurríkulu kona-ba klase internasionál liu-liu ba departamentu medisina jerál ne’e ami aprezenta ona ba MESSK no Vise Primeiru-Ministru. Programa klase internasionál ne’e molok lori mai iha Timor-Leste, la’o tiha ona iha nasaun Xina, Malázia no Índia rasik, entaun agora sira lori tan mai iha Timor-Leste. Agora ne’e la’ós tenke hetan akreditasaun husi MESSK, tanba ne’e akreditasaun internasionál, entaun MESSK ne’e so bele hetan koñesimentu de’it ne’ebé ami aprezenta ona ba sira. Entaun ema husi internasionál mak sei mai halo akreditasaun bainhira aula ne’e la’o,” nia esplika.
Daudaun ne’e estudante 300-resin husi nasaun oin-oin halo ona inskrisaun ba klase internasionál ne’e.
“Tinan ne’e ami estabelese klase internasionál ba departamentu medisina jerál ba nível lisensiatura, estudante sira ne’e mai husi Índia Filipina no timoroan. Klase ne’e sei hahú iha fulan-setembru iha UNPAZ. No estudante sira ne’ebé rejistadu atu tuir aula ne’e husi Índia no Filipina hamutuk 300 no timoroan na’in-10,” nia informa.
Dosente sira ne’ebé sei hanorin iha klase internasionál ne’e hamutuk 50 husi Índia no balun husi UNPAZ rasik.
Jornalista : Osória Marques
Editora : Julia Chatarin
