DILI, 14 Agostu 2024 (TATOLI) – Ministériu Agrikultura, Pekuária, Peska no Floresta (MAPPF) sei fornese ikan tonelada ida-resin ba eskola sira iha Bobonaro, liuliu ba Programa Merenda Eskolár hodi hasa’e nutrisaun ba alunu hamutuk 1.700.
Diretór-Jeral Peska, Akikultura no Jestaun Rekursu Akuátiku, Celestino Barreto, informa katak fornesimentu ikan ba programa ne’e ba fulan haat, hahú husi Setembru to’o Dezembru. Programa fornesimentu ikan ne’e sei lansa iha loron 16 Agostu iha Bobonaro.
“Programa Merenda Eskolár ne’e nu’udar kontinuasaun ida husi programa Governu anteriór nian, oinsá atu apoia estudante sira iha kada eskola iha territóriu hodi hadi’ak nutrisaun ba estudante sira”, Celestino Barreto hateten iha Comoro, ohin.
Tuir nia, merenda eskolar ne’e parte ida husi responsabilidade Ministériu Agrikultura nian atu prepara ai-han nutritiva sira hodi fornese ba Ministériu Edukasaun atu apoia ba eskola sira. Tanba ne’e, iha faze dahuluk MAPPF sei fornese ikan tonelada 1-resin ba Edukasaun atu distribui ba eskola sira iha Bobonaro atu alunu sira konsumu ikan ne’e.
“Ikan sira ne’ebé ita fornese ba eskola sira iha Bobonaro ne’e, ita sei kolleta husi sentru Leo-Hitu ne’ebé sai hanesan sentru viveiru ida ne’ebé durante ne’e ita utiliza hodi haki’ak ikan fresku sira”, nia adianta.
Nia dehan bainhira estudante 1.700 ne’e mak konsumu ikan liuhusi Programa Merenda Eskolár ne’e maka tuir estimativa iha fulan haat nia laran ne’e alunu ida sei konsumu ikan hamutuk grama 200.
Diretór ne’e esplika katak programa ida ne’e foin tama iha pilotu ne’ebé sei hahú uluk husi Bobonaro no bainhira ida ne’e susesu maka sei kontinua ba munisípiu sira seluk iha territóriu.
Fornesimentu ikan husi Ministériu Agrikultura ba eskola sira iha Bobonaro ne’e sufisiente, tanba daudaun ne’e Diresaun-Jerál Peska tau-matan hela ba sentru viveiru ikan iha suku Leo-hitu no tuir kálkulu ikan sira ne’e bele responde ba programa durante fulan hitu.
Celestino Barreto salienta katak ikan nu’udar ai-han ida ne’ebé nia proteína aas no bainhira alunu sira konsumu, sira bele hetan saúde di’ak. “Tanba ne’e, ho distribuisaun ikan ba eskola sira ne’e nu’udar parte ida atu hadi’a rekursu umanu iha Timor-Leste”, realsa.
Benefísiu konsumu ikan maka sei fortalese sistema imunitáriu, fortalese ruin no nehan, estimula kapasidade kongnitiva no dezenvolvimentu intelektuál, prevene moras kardiovaskulár no prevene envellesimentu perkose ba kulit.
Iha sorin seluk, Diretór Nasionál Edukasaun Inkluziva ba Asaun Sosiál Eskolár, Fernando Soares, dehan merenda eskolár ne’e responsabilidade másima mai husi Ministériu Administrasaun Estatál (MAE), maibé Ministériu Edukasaun iha nafatin papél atu halo kontrolu no halo observasaun ba implementasaun programa ne’ebé realiza iha eskola sira iha territóriu.
“Agora, polítika Governu nian, liuhusi Ministériu Agrikultura, Pekuária Peska no Floresta atu lansa distribuisaun ikan ba eskola sira iha Bobonaro ne’e Ministériu Edukasaun konsidera polítika di’ak tebes, tanba sei tulun atu hasa’e nutrisaun estudante sira. Tanba ikan nu’udar ai-han ida ne’ebé nakonu ho nutrisaun, bainhira estudante sira konsumu bele ajuda sira, liuliu dezenvolve sira-nia kakutak atu sai labarik ida ne’ebé iha poténsia ne’ebé di’ak”, realsa.
Nune’e, liuhusi lansamentu programa ne’ebé sei realiza iha Bobonaro ne’e, Ministériu Edukasaun iha nafatin esperansa ba MAPPF atu fornesimentu ikan bele kontinua ba oin to’o eskola sira seluk iha territóriu.
Programa Merenda Eskolár nu’udar subsídiu ne’ebé fó iha ámbitu asaun sosiál eskolár, ne’ebé ho objetivu hodi asegura direitu han loron-loron ho hahán saudável, ekilibrada no indispensável ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulár hodi integra ba rede públika ne’ebé situa iha rai-laran hodi promove ninia prosesu ensinu-aprendizajen.
Jornalista: Tomé Amado
Editora: Maria Auxiliadora
