BAUCAU, 14 agostu 2024 (TATOLI) – Sala Unidade Raiu-xís iha Ospitál Rejionál Eduardo Ximenes (HoREX, sigla portugés) munisípiu Baucau kondisaun estragu nune’e paradu halo atendementu durante fulan-hitu ona.
Diretor ezekutivu HoREX Baucau, Claudino Ximenes esplika, situasaun referida akontese hahú iha inísiu tinan-2024 nune’e pasiente sira tenke obrigadu transfere ba Ospitál Nasionál Guido Valadares (HNGV, sigla portugés) Dili, maske antes ne’e kompañia responsável normaliza ona maibé kontinua sei kontinua aat inklui didin sala referida nakfera.
“Agora daudaun ita seidauk utiliza, sira-ne’ebé nesesidade prezisa duni atu halo raiu-xís ita transfere ba Dili,” Diretór Ezekutivu HoREX Baucau hateten iha Vila Nova, kuarta ne’e.
Ho kondisaun odamata aat no didin nakfera fó impkatu ba ekipamentu nune’e posibilidade radiasaun ba pasiente bainhira teste raiu-xís.
Dirijente HoREX Baucau relata ona situasaun referida ba parte Ministériu Saúde no informa sei esforsu atu kompra ekipamentu iha Indonézia nune’e bele funsiona fali hodi halo atendimentu ba pasiente sira.
Pasiente ne’ebé halo transferénsia ba nasionál maioria kondisaun grave, tanba hetan asidente, enkuantu pasiente seluk ne’ebé halo diagnóstika sei kontinua fó asisténsia, tanba sei bele utiliza teste laboratóriu.
“To’o agora ita halo transferénsia ba HNGV hamutuk pasiente na’in-303,” Claudino akresenta.
Jornalista : Natalino Belo
Editór : Evaristo Soares Martins
