DILI, 14 agostu 2024 (TATOLI) – Governu liu husi reuniaun Konsellu Ministru (KM), kuarta ne’e, iha Palásiu Governu, Dili, diskute no delibera hodi aprova Programa selebrasaun aniversáriu konsulta populár ba dala-25 ne’ebé sei selebra iha territóriu nasionál no deside toleránsia pontu iha loron 28 no 29 Agostu.
“Selebrasaun iha Dili, sei hahú iha loron 28 fulan-agostu, iha Estádiu Munisipál Dili, ho abertura ofisiál ne’ebé sei marka prezensa hosi Primeiru-Ministru no membru Goveru sira seluk,” Ministru Prezidente Konsellu Ministru Agio Pereira hateten hafoin remata reuniaun KM.
Nia dehan, iha loron ne’e sei inaugura espozisaun ida kona-ba UNAMET no feira livru. Iha loron 29 fulan-agostu sei realiza han-kalan ofisiál iha Palásiu Lahane no espozisaun ida iha Arkivu no Muzeu Rezisténsia Timorense (AMRT) ne’ebé dedika ba feto sira rezisténsia nian.
Iha loron ne’e mós, sei hala’o “Horta Show”, talk show espesiál ida ne’ebé sei marka prezensa hosi Prezidente Repúblika, Primeiru-Ministru no Sekretáriu-Jerál Nasaun Unidas.
Pontu aas husi komemorasaun sira sei hala’o iha loron 30 fulan-agostu, loron ne’ebé selebra aniversáriu konsulta populár tinan 1999 nian ba dala-25. Loron ida ne’e, sei hala’o sesaun solene ida iha Parlamentu Nasionál, ho prezensa Sekretáriu-Jerál Nasaun Unidas, Prezidente Repúblika, Primeiru-Ministru no dignitáriu sira seluk.
Nune’e, iha parte lorokraik, iha Estádiu Munisipál Dili sei hala’o serimónia públika, iha ne’ebé sei inklui diskursu, dansa tradisionál, minutu-hakmatek hodi fó omenajen ba vítima sira, no iha fogu artifísiu espetákulu ida. Hafoin serimónia ofisiál remata, sei konvida públiku hodi partisipa iha konsertu muzikál iha Sentru Konvensaun Dili (CCD-sigla portugés).
Hodi rekoñese katak konsulta populár loron 30 fulan-agostu tinan 1999 nu’udar momentu desizivu ba Povu Timoroan nia autodeterminasaun no restaurasaun independénsia Timor-Leste nian, Primeiru-Ministru, liu hosi despaxu, nomeia membru Governu no lider administrasaun públika sira hodi prezide serimónia sira ne’ebé selebra aniversáriu ba dala-25 hosi data istórika ida-ne’e, ne’ebé sei hala’o iha munisípiu no postu administrativu sira iha Timor-Leste laran tomak, hodi garante reprezentasaun institusionál ne’ebé loloos no partisipasaun maka’as hosi populasaun.
Toleransia pontu iha loron 28 no 29
Iha ámbitu KM ne’e deside hodi fó toleránsia pontu iha loron 28 no 29 fulan-agostu, iha ámbitu selebrasaun Aniversáriu Konsulta Populár ba dala-25 no iha loron 09-11 fulan-setembru, iha okaziaun vizita Sua Santidade Amu-Papa Francisco nian mai Timor – Leste.
Jornalista: Hortencio Sanchez
Editór: Florencio Miranda Ximenes
