Baucau rejista sarani rihun 13-resin atu partisipa vizita Papa Francisco
BAUCAU, 15 agostu 2024 (TATOLI) – Komisaun Organizadora nível munisipál Baucau provizóriu rejista ona sarani hamutuk 13.101 ne’ebé disponivel atu partisipa misa iha Tasi-tolu relasiona ho vizita Papa Francisco mai Timor-Leste.
Prezidente Komisaun Organizadora Munisipál Baucau atuál Prezidente Autoridade Munisípiu (PAM) Baucau, Veneranda E. M. Lemos Martins, esplika, husi númeru referida, sarani sira rejista naran liuhusi kada postu administrativu hanesan Postu Baucau Vila hamutuk 5.571, Baguia 800, Laga 843, Quelicai 1.803, Vemasse 741 no postu Venilale na’in-3.343.
“Munisipiu Baukau nia rejistrasaun ba sarani sira to’o ohin loron hamutuk 13.101,” Prezidente Komisaun Organizadora Munisípiu Baucau hateten iha Vila nova, kinta ne’e.
Komisaun Organizadora Munisipal simu orientasaun husi nasionál relasiona ho vizita Papa Francisco nune’e kontinua estabelese komisaun nível munisípiu liuhusi koordenasaun ho responsável Igreja sira nune’e rejista sarani sira husi aldeia, suku inklui postu administrativu ne’ebé kolabora ho kada parókia sira.
Alende rejista partisipante, komisaun organizadora mos halo preparasaun seluk hanesan prepara transporte, hahan no fatin deskansa iha Dili antes partisipa misa iha loron 10 fulan-setembru, Tasi-Tolu, Dili.
Transporte ne’ebé prepara hamutuk 132 kompostu apoia husi Governu sentrál no privadu hanesan bís 31, kamioneta 74, carry sia, angguna tolu, gran-max neen no transporte privadu 9.
“Agradese tanba sarani sira iha Baucau hotu-hotu prontu atu lori hahan, depois ita buka tan maneira seluk atu suporta hanesan extra ida,” Veneranda Lemos akresenta.
Sarani husi Baucau sei aranka iha loron 09 fulan-setembru nune’e sei deskansa iha Hera antes partisipa misa iha loron tuir mai ne’ebé sei akompaña husi Komandu Polísia Nasionál Timor-Leste (PNTL) Munisípiu Baucau.
Jornalista : Natalino Belo
Editór : Evaristo Soares Martins
