DILI, 15 agostu 2024 (TATOLI)- Ministru Justisa, Sergio Hornai, informa katak empreza Thales hamutuk ekipa tékniku Ministériu Justisa (MJ) konklui ona instalasaun mákina Isla ba produsaun Pasaporte rua ne’ebé molok ne’e Governu halo akizisaun iha Filándia.
“Horseik ha’u foin simu informasaun katak empreza hamutuk tékniku Ministériu Justisa konklui ona instalasaun mákina Isla ba produsaun Pasaporte rua ne’ebé molok ne’e Governu halo akizisaun iha Finlándia. No, mákina rua ne’e agora daudaun sira lori husi Finlándia to’o ona iha Singapura. Graças a Deus ita espera fulan ne’e bele to’o iha Timor-Leste,” Sergio Hornai hateten jornalista sira hafoin partisipa serimónia despedida bolseiru na’in-50 ne’ebé atu halo sira-nia estudu iha área Diretu iha Universidade Portugal, iha Sentru Formasaun Jurídiku Jusáriu, Caicoli, kinta ne’e.
Governante ne’e dehan, “Kuandu mákina produsaun Pasaporte ne’e mak to’o mai ita-nia rai, ha’u sei konvida ita bo’ot sira (mídia) para mai halo kobertura ba ida-ne’e”, nia adianta.
Ministru Sergio Hornai dehan, mákina produsaun Pasaporte ne’e kuandu mai ona, entaun ida-ne’e bele ajuda liután servisu Notariadu nia ba iha atendimentu públiku ba iha Pasaporte.
“Ita hotu espera katak mákina produsaun Pasaporte ho naran Isla ne’e mai bele ajuda servisun Notariadu bele atende ita-nia povu ho di’ak liga ho Pasaporte,” nia afirma.
Rekorda fali katak, antes Governu prevee millaun $2 hodi kontrata empreza Thales iha Sigapura atu halo akizasaun ba mákina produsaun ba passaporte rua iha Finlándia hodi bele fasilita liu tán servisu Notaridu ba atedimentu públiku iha passaporte nian.
Jornalista: Natalino Costa
Editór: Rafael Ximenes de A. Belo
