DILI, 15 agostu 2024 (TATOLI) – Prezidente Asosisaun Parteira Munisípiu Dili, Joaquina Fransisca Belo, husu ba membru parteira sira atu halo komunikasaun di’ak ho inan sira ne’ebé atu partu, atu sira bele simu tratamentu ne’ebé konfortavel.
“Hanesan Prezidente Asosiasaun Parteira iha Munisípiu Dili nafatin koko hadia atendimentu maske populasaun sira kestiona kona-ba étika komunikasaun entre parteira ho família, ezemplu; parteira sira balun siak, hirus ida-ne’e, ba oin, ami sei fó kapasitasaun ba ami-nia membru parteira sira no mós ba ami-nia profisionál saúde sira atu bele fó atendimentu ne’ebé mak di’ak liu”, Joaquina dehan ba jornalista sira iha City8 Manleuana, ohin.
Nia adianta, formasaun ba membru parteira sira sei foku liu ba étika komunikasaun no mós étika atendimentu nian atu komunidade sira bele sente ho kontente, partikularmente inan isin rua ne’ebé mak presiza tratamentu.
“Iha parte ida, ami hanesan profisionál saúde, liuliu parteira sira, ami juramentu no ami-nia servisu mak ida-ne’e, ami laiha hanoin ida atu fó atendimentu ne’ebé mak la di’ak ba ami-nia pasiente sira, maibé ami koko fó atendimentu ne’ebé mak di’ak no bainhira buat balun ne’ebé mak ladun di’ak ami koko atu hadia ba oin”, nia hateten.
Nia akresenta, planu feitu hotu ona, tinan oin, sei disponibiliza formasaun ba parteira sira iha Munisípiu Dili.
“Ami tau ona planu katak tinan oin ami tenke fó treinamentu ba parteira sira iha munisípiu Dili nian kona-ba liña komunikasaun entre profisionál saúde ho komunidade. Tanba ami sei halo promosaun ba inan isin rua sira no mós ba saúde reprodutiva adolosente ba joven sira”, nia subliña.
Munisípiu Dili iha membru asosisaun ba parteira hamutuk 300-resin, hosi ne’e sura hosi parteira sira iha Hospitál Nasionál Guido Valadares, Servisu Saúde Munisípiu Dili, parteira sira ne’ebé iha NGO, tanba APTL laos haree ba parteira sira ne’ebé mak servisu de’it, maibé la servisu mós akumula hotu iha asosiasaun nia laran.
Jornalista : Felicidade Ximenes
Editór : Zezito Silva
