DILI, 15 agostu 2024 (TATOLI)–Prezidente Institutu Politékniku Betano (IPB), Acácio Cardoso Amaral, sujere Governu atu fasilita kréditu ba joven dezempregu sira iha Timor-Leste hodi sira bele inisia negósiu rasik.
“Ha’u hanoin Governu presiza fasilita ho kapitál hodi inisia sira-nia serbisu ka negósiu rasik. Pur ezemplu sira bele hakiak animál hanesan manu tanba ida-ne’e mós presiza kapitál, Governu presiza fasilitaliuhusi banku ka kréditu para joven bele independente. Tanba tinan-tinan estudante gradua barak maibé kampu traballu menus,” Prezidente IPB hateten iha ninia knaar fatin, kinta ne’e.
Akadémiku ne’e akompaña, kada tinan ema gradua barak maibé laiha kampu traballu ba sira.
“Tinan-tinan estudante gradua no rona ema dehan ita-nia output tinan-tinan maizumenus 15.000, maibé ein felizmente ita nasaun kiik-oan, indústria mak tun no merkadu traballu mós limitadu tebes, entaun ita haree barak liu iha absorve iha setór públiku. Daudaun ne’e tanba ita-nia setór ne’e privadu seidauk barak, oituan loos, ne’e ita prodús barak se ita-nia produtu kualidade mak ita mós bele haruka sira bá rai-li’ur hanesan ho nasaun sira seluk. Ezemplu hanesan ema Filipina sira prense padraun internasionál hodi bá serbisu, ita mós bele se ita prense padraun internasionál, agora ita lae,” nia akresenta.
Notísia relevante : MKI propoin ba KM transforma kréditu SUAVE ba kréditu SAUDAVEL
Iha sorin seluk, Jerente institutu ne’e admite katak IPB kada tinan simu estudante limitadu tanba infraestrutura seidauk to’o, tanba ne’e presiza tan iha politékniku seluk.
“Ita presiza loke tan politékniku sira nune’e ema ne’ebé karik nia labele hetan serbisu, entaun nia mós bele kria mesak serbisu ba-an rasik. Maibé IPB tenta ho rekursu ne’ebé iha, IPB mós falta buat barak, nune’e ami-nia graduadu sira mós la’o haleu hela buka serbisu,” Acácio Cardoso, tenik.
Graduadu tinan 2019 husi Universidade Nasionál Timor-Lorosa’e (UNTL), Delfin Ximenes, hateten, Governu presiza loke kampu traballu barak ba joven sira iha Timor, nune’e joven sira labele sai beibeik bá rai-li’ur hodi buka moris iha ema-nia rai no ema husi rai seluk mak mai fali halo serbisu iha rai-laran.
“Ita sempre hakilar beibeik katak joven mak futuru nasaun nian, maibé realidade kada tinan kada fulan joven sira sai barak bá nasaun seluk hodi hadi’a moris, entaun ne’e problema boot ba ita-nia dezenvolvimentu iha ita-nia rai, agora ema rai-na’in bá fali nasaun seluk no ema husi rai seluk mak mai fali iha ita-nia rai ne’e oinsá atu dezenvolve Timor ne’e ba oin no futuru,” nia dehan.
Tanba ne’e, Delfin Ximenes, sujere ba Governu, dalan di’ak liu mak loke kampu barak ba timoroan sira atu sira nafatin serbisu iha rai rasik hodi dezenvolve nasaun ne’e iha futuru no bainhira loke vaga ruma labele uza beibeik sistema familiarizmu.
“Husu ba Governu karik bele loke kampu traballu iha área oin-oin atu joven sira bele bá halo serbisu hodi sustenta moris, ami sempre esforsu ba vaga ruma ne’ebé ministériu sira loke, maibé ita ba ne’e hanesan taka falta de’it, satán ita família laiha laran. Ne’ebé karik sujere mós ba Governu, liu-liu ministériu sira atu loke vaga ruma ne’e labele uza sistema família, tanba ami mós iha kapasidade atu kompete maibé tanba família laiha,” nia katak.
Jornalista : Osória Marques
Editora : Julia Chatarina
