BOBONARO, 15 agostu 2024 (TATOLI)-Ministeriu Edukasaun, kinta ne’e realiza serimónia asina termu aseitasaun pose ba manorin ingresu espesiál no rejime karreira dosente hamutuk na’in-491 iha munisípiu Bobonaro hodi muda sira-nia estátutu husi kontratadu ba funsionárių permanente.
Ministra Edukasaun, Dulce de Jesus Soares, esplika governu halo esforsu hirak-ne’e atu rezolve no hakotu problema ne’ebé manorin sira hasoru, nune’e bele hasa’e kualidade edukasaun ba timoroan sira.
Nia dehan, manorin tenke uza kapasidade no kreatividade idak-idak nia hodi buka solusaun ba estudante sira atu domina siénsia iha atividade ensinu no aprendizajen.
“Ministériu Edukasaun enfrenta problema barak, la’ós oituan, problema boot liu mak estudante lee no hakerek lahatene iha primeiru siklu, ema barak reklama sira-nia oan ba eskola lahatene lee ho hakerek, tanba ne’e ha’u-nia doben profesór sira tenke tau atensaun ba hanorin ita-nia oan sira ho di’ak,” nia hateten iha Jináziu Maliana.
Tuir nia, kualidade edukasaun mak sai objetivu finál husi serbisu Ministériu Edukasaun, tanba ne’e nia husu manorin sira atu serbisu ho profesionál no responsablidade atubele atinje meta ne’ebé governu hakarak.
“Serbisu hotu ita halo objetivu ida de’it, hasa’e kualidade edukasaun ba povu Timor nia oan,” nia katak.
Sekretáriu Estadu Ensinu Sekundáriu Jerál no Tékniku Vokasionál, Domingos Lemos, reforsa ministériu halo esforsu ne’e atu responde ba kompromisiu Primieiru Ministru hodi rezolve estatutu profesór kontratadu.
Nia dehan, profesór sira tenke aproveita didi’ak hodi presta serbisu ho di’ak no kualidade.
“Sai profesór iha kuadru permanente, la’ós previleiju boot ida, ne’e la’ós prémiu ida atu manán, mas responsabilidade boot ida mak imi simu, imi ohin jura ona atu halo tuir de’it lei ne’ebé mak iha,” nia hateten.
Prezidente Komisaun Funsaun Públika (CFP, sigla portugés), Agostinho Letêncio de Deus, esplika, ohin governu ofisialmente hakotu ona problema ne’ebé manorin sira hasoru iha tinan hirak ba kotuk.
“Ita-boot sira-nia direitu Komisaun Funsaun Públika ho Ministeriu Edukasaun sei la taka matan atu rezolve, imi jura ona atu dedika-aan ba estdu,” nia fó hanoin.
Prezidente Autoridade Munísipiu Bobonaro, Alexandrelino Pires,.enkoraja emposadu-sira atu serbisu ho fuan no laran, tanba futuru labarik-sira iha manorin sira-nia liman.
“Ohin, imi jura ona atu obedese ba lei hodi serbí estadu, la haree ba kór, la haree ba organizasaun,” Prezidensiál Autoridade Bobonaro fó hanoin ba emposadu-sira.
Enkuantu serimonia ne’e partisipa husi membru Parlamentu Nasionál, dirijente Ministeriu Edukasaun no família emposadu-sira.
Jornalista: Sérgio da Cruz
Editór: Evaristo Soares Martins
