DILI, 15 agostu 2024 (TATOLI) – Ministériu Saúde no Fundu Nasaun Unida ba Populasaun (UNFPA) halo kooperasaun ho Asosiasaun Parteira Timor–Leste (APTL) halo sensibilizasaun kona-ba Violénsia Bazeia ba Jéneru ba parteira iha Munisípiu Dili.
Objetivu husi sensibilizasaun ne’e atu hasa’e membru sira- ia koñesimentu no abilidade iha profisaun parteira, servisu saúde inan, oan no bem estar família nian.
“Ministériu Saúde no UNFPA kolabora ho APTL, fasilita formasaun VBJ ba parteira sira iha sentru saúde lima iha Munisípiu Dili atu parteira sira iha koñesimentu kona-ba Violénsia Bazeia ba Jéneru hodi prosesa liuhosi kanál legál ne’ebé aplikavel iha Timor-Leste”, Reprezentante Saúde Maternal Infantil iha Ministériu Saúde, Sidalia Belo, informa iha City8 Manleuana, ohin.
Sidalio dehan, formasaun ida-ne’e importante tebes ba parteira hotu, atu identifika oinsa kona-ba sintoma husi inan isin-rua e’ebé hetan abuzu molok partu.
Iha fatin hanesan, Reprezentante UNFPA, Domingas Bernando, afirma formasaun ida-ne’e parteira sira sei iha koñesimentu natoon no motivadu atu hato’o kazu violénsia ne’ebé inan isin- rua hasoru ba lei liu husi promove igualdade jéneru no hakotu Violénsia Bazeia ba Jéneru iha Timor-Leste.
“Inan isin-rua barak ne’ebé partu oan iha sentru saúde iha territóriu nasionál ne’ebé hetan violénsia husi ema irresponsavel, tanba ne’e formasaun ida-ne’e fasilita parteira sira hotu atu iha koñesementu hodi trata inan isin-rua atu sira bele iha korajen no iha evidénsia ne’ebé klaru atu bele akompaña ba kanál legál sira ne’ebé aplikavel iha Timor-Leste’’, nia relata.
Nia hatutan, formasaun ne’e destina ba parteira sira hamutuk 100-resin iha Sentru Saúde Munisípiu Dili.
Nia informa, UNFPA no MS iha kolaborasaun ho APTL fó ona formasaun Violénsia Bazeiaba Jéneru ba inan parteira 300-resin iha territoriu nasionál Timor-Leste.
Prezidente Asosiasaun Parteira iha Munisípiu Dili, Joaquina Francisco Belo, agradese ba MS no UNFPA ne’ebé fasilita ona parteira sira iha sentru saúde lima iha Dili hanesan Becora, Metinaro, Comoro, Formosa no Vera Cruz.
“Nune’e lori parteira sira-nia naran iha Munisípiu Dili, ha’u agradese ba MS no UNFPA ba sira-nia apoiu no husu ba parteira sira hotu atu foka ba formasaun Violénsia Bazeia ba Jéneru hodi atende inan isin-rua sira ne’ebé partu ho profisionál’’, Joaquina konklui.
Jornalista : Felicidade Ximenes
Editór : Zezito Silva
