DILI, 15 agostu 2024 (TATOLI) – Ministru Defeza, Kontra Almirante, Donaciano Costa Gomes Pedro ‘Klamar Fuik’, dehan Xina mantein kompromisu hodi apoia Ministériu Defeza no FALINTIL-Forsa Defeza Timor-Leste (F-FDTL) atu konstrui ospitál militár.
“Ministériu Defeza iha oportunidade hetan vizita husi delagasaun ida mai husi Xina no delegasaun ne’e kompostu husi Adjuntu Xefe Kooperasaun Internasionál husi Ministériu Defeza Xina nian Majór Jenerál. Zhang Baoqun. Sira mai tanba bazeia ba konvite husi Ministru Defeza Timor-Leste hodi mai haree besik sobre kooperasaun ne’ebé Xina halo ho Timor-Leste. Iha ámbitu ida-ne’e xefe delegasaun mai atu intensifika tán área kooperasaun ne’ebé ita halo ona iha domíniu defeza atu haree oinsá mak sira bele kontrui ospitál militár ida ne’ebé mak sei konstrui andar ualu ho kapasidade bele simu pasiente atus ida bele hela iha laran”, Klamar Fuik hateten ba jornalista sira hafoin enkontru ho Adjuntu Xefe Kooperasaun Internasionál husi Ministériu Defeza Xina nian Majór Jenerál. Zhang Baoqun ho nia delegasaun ne’ebé halao iha edifísiu Ministériu Defeza Fatuhada, kinta ne’e.
Nia dehan, IX Governu Konstitusionál iha programa ida atu harii ospitál militár iha tinan ida- ne’e, maibé Xina hato’o prontidaun katak sira hakarak fó doasaun liuhusi harii ospitál tanba Governu Timor-Leste halo doasaun ida-ne’e, entaun husi Ministériu Defeza hatudu ona fatin atu konstrui ospital militár.
“Fatin ba konstrusaun ospitál militár mak edifísiu Ministériu Defeza no Kuartel Jenerál F-FDTL nia kotuk, rai ba konstrusaun hamutuk etare ida-resin ho media 10 metru kuadradu”, nia adianta.
Nia dehan, konstrusaun ba ospitál militár ne’e depende ba Governu Xina bainhira mak sira atu konstrui.
Governante ne’e hateten, ospitál militár ne’e sei serve ba militár sira, sei serve polísia sira no sei serve ba militár no polísia sira-nia família, nune’e mós ba veteranu sira inklui mós ba públiku jerál.
Nia dehan, iha reuniaun ne’e mós hakarak intensifika kooperasaun entre Xina ho Timor-Leste iha área formasaun ensinu no peskiza.
“Sira mós hakarak oinsa mak bele forsa armada rai rua bele servisu hamutuk para bele kontribui ba dezenvolvimentu nasionál liuliu oinsá mak apoia populasaun sira iha konstrusaun saida mak militár sira bele halo ba povu”, nia afirma.
Jornalista: Natalino Costa
Editór : Zezito Silva
