DILI, 16 agostu 2024 (TATOLI)–Servisu Edukasaun munisípiu Ainaro presiza profesór 60 husi programa rekrutamentu bolsa kandidatu faze daruak.
“Antes ne’e 43 no 18 mak sai tiha tanba sira la toman kondisaun klima iha Ainaro,” Diretór Servisu Edukasaun munisípiu Ainaro, Patrício da Costa, informa ba Agência Tatoli, iha ninia knaar fatin Ministériu Edukasaun (ME), Vila-Verde, sesta ne’e.
Ensinu báziku daudaun ne’e ho nia filiál profesór 98 maibé profesór 25 de’it mak hela hodi hanorin, enkuantu seluk ho idade reforma.
Notísia relevante : Servisu Edukasaun RAEOA husu ME koloka tan profesór bolsa kandidatu na’in-40
Diretór Servisu Edukasaun Ainaro, hateten, to’o agora seidauk rona informasaun kona-ba kolokasaun profesór faze daruak husi rekursu umanu, maski ezame nasionál besik ona maibé ne’e depende husi ME.
Totál eskola ensinu báziku ho nia filiál hamutuk 93, estudante iha 18.808.
Nune’e mós, Diretór Servisu Edukasaun munisípiu Manatuto, Patrício da Cruz Quintão, hateten, Edukasaun Manatuto presiza profesór ba hanorin iha ensinu báziku sentrál ho nia filiál 90-resin.
“Tanba iha tinan kotuk Organizasaun Naun Govermentál balun serbisu hamutuk ho kuadru pesoál Ministériu Edukasaun, ne’ebé identifika ona profesór hanorin iha ensinu báziku, nune’e presiza 120-resin. Tanba iha kolokasaun dahuluk Ministériu Edukasaun koloka de’it 29, entaun ita presiza tan 90-resin,” nia tenik.
Profesór Manatuto oan ne’ebé pasa iha ezame faze daruak bolsa kandidatu ne’e hamutuk 150, entaun espera katak ME bele koloka tuir pedidu ne’ebé edukasaun Manatuto hato’o.
Jornalista : Osória Marques
Editora : Julia Chatarina
