Hafoin tratamentu iha HNGV, VPM Assanami alta ona
DILI,16 agostu 2024 (TATOLI)— Diretora Servisu Asisténsia Médika Hospital Nasionál Guidu Valadares (HNGV), Ana Magno, informa, Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino hala’o hela tratamentu iha iha sala Very Important Person (VIP) HNGV tanba kolen.
“Iha tersa kalan maizomenus tuku 8 hanesan ne’e Mariano Assanami mai iha óspital baixa iha VIP HNGV no médiku sira sei halo observasaun ba nia saúde tanba presiza atu halo ezaminasaun ruma iha parte balun tan relasiona ho nia kondisaun. Jeralmente tanba kolen ne’ebé presiza deskansa tanba ne’e ami hanoin katak di’ak liu ami halo baixa de’it iha ospital hodi halo observasaun di’ak no mós halo ezaminasaun ba nia saúde nune’e ita bele hatene loos kauza husi sente kolen ne’e saida,” Ana Magno dehan nia iha knaar fatin HNGV, Díli.
Diretora ne’e afirma, VPM segundu la moras atakasaun ruma maibé tanba kondisaun kolen ho moras ida naran physical fighting akontese ba VPM Segundu tanba ne’e lori mai ospitál médiku sira observa iha sala VIP.
“Agora ami uza rekursu ne’ebé óspital nasionál iha atu halo medical checkup husi rezultadu ami hetan katak presiza tan ezaminasaun balun atu hala’o ba kondisaun hodi konfirma VPM Assanami nia kondisaun mak kolen de’it laiha tán buat ruma,” nia afirma.
Diretora Ana Magno esplika, maske membru Governu sente kolen de’it maibé presiza halo tan ezaminasaun ruma nune’e bele hatene husi kondisaun kolen keta iha moras seluk ruma maibé rekursu iha HNGV limitadu tanba ne’e dalaruma presiza transfere ba rai-li’ur.
“Uza rekursu ne’ebé ita iha hodi haree kona-ba ida ne’e karik ita presiza tan ezaminasaun ruma bazeia ba sintoma hatudu kolen ne’e,” nia afirma.
Daudaun ne’e Vise-Primeiru-Ministru Mariano Assanami Sabino kondisaun di’ak no médiku sira fó ona alta hodi fila ba uma.
Notísia relevante:Ai-moruk ho estoke 14% mamuk iha HNGV
Jornalista: Felicidade Ximenes
Editór: Rafael Ximenes de A. Belo
