DILI, 16 agostu 2024 (TATOLI) – Ministru Defeza, Kontra Almirante, Donaciano Costa Gomes Pedro ‘Klamar Fuik’, dehan Ministériu Defeza husu adisionál millaun $10 iha Orsamentu Jerál Estadu (OJE) 2025, atu reforsa dezenvolvimentu infraestrutura militár.
“Orsamentu tetu inisiál ba tinan oin ba Ministériu Defeza hetan millaun $7. Falintil-Forsa Defeza Timor-Leste ba tinan oin hetan millaun $31 no Institutu Defeza Nasionál hetan $800.000. Maibé iha aprezentasaun Komisaun Revizaun Orsamentu, Ministériu Defeza husu adisionál millaun $10 no F-FDTL mós husu adisionál millaun $10-resin no Institutu Defeza Nasionál mós ohin ami husu millaun $1.3”, Klamar Fuik hateten ba jornalista sira hafoin aprezentasaun orsamentu Ministériu Defeza iha Komisaun Revizaun Orsamentu Polítika (KROP) iha Ministériu Finansas, Aitarak-Laran, sesta, ohin.
Nia esplika, orsamentu adisionál millaun $10 ba Ministériu Defeza hodi fó prioridade ba infraestrututura militár no nesesidade instituisaun. Enkuantu orsamentu adisionál F-FDTL ne’e prioridade ba dezenvolvimentu forsa armada. Adisionál millaun $1.3 ba Institutu Defeza Nasionál atu haforsa programa formasaun rekursu umanu sira ne’ebé IDN sei kontinua iha tinan oin.
“Ita bo’ot sira hatene, infraestrutura militár balun ita hahú kedan iha tinan kotuk no tinan ida-ne’e ita kontinua infraestrutura militár hanesan agora iha Damalaran Bobonaro. Ha’u fi’ar katak obra sira ne’e ita sei fó kontinuidade porke ita sei destaka ita-nia forsa kompañia operasionál ida iha ne’ebá, tanba ne’e mak ita husu adisionál millaun $10”, nia adianta.
Klamar Fuik realsa katak IDN husu osan adisionál millaun $1.3 tanba atu haforsa formasaun rekursu umanu iha tinan oin, tanba IDN kria iha 2010 presiza atu forma futuru lider sira iha future.
“Tinan oin IDN sei kontinua nia atividade formasaun sira hodi prepara mós futuru lideransa, ho nune’e mak ohin ita solisita ba Komisaun Revizaun Orsamentu tau tán osan adisionál millaun $1.3 “, nia informa.
Governante ne’e husu ba komisaun orsamentu atu hadia tán buat balun husi proposta orsamentu molok Komisaun Revizaun halo aprovasaun.
“Ami submete ona proposta orsamentu Ministériu Defeza, F-FDTL no IDN ba Komisaun Revizaun Orsamentu no sira seidauk aprova tanba Komisaun Revizaun Orsamentu sira sei re-avalia fila fali hodi haree no sei bolu fila fali ami mai iha ne’e, ohin ka aban ne’e depende sira para depois halo aprovasaun finál”, nia konklui.
Jornalista: Natalino Costa
Editór : Zezito Silva
