BAUCAU, 16 agostu 2024 (TATOLI) – Sarani Dioseze Baucau hamutuk rihun-31-resin tuir planu sei partisipa misa solene relasiona ho vizita Papa Francisco mai Timor-Leste iha Tasi-Tolu, Dili.
Bispu Diozese Baucau, Dom Leandro Maria Alves, esplika, lista totál husi númeru referida sei provizóriu bainhira Komisaun Organizadora preparasaun vizita Papa Francisco rekolla hosi munisípiu haat ne’ebé hola parte iha Diozese Baucau nia mahon.
“To’o momentu ida-ne’e provizoriamente rihun-31-resin, sei kontinua tán rejistu,” Bispu Diozese Baucau hateten iha Vila Antiga, sesta ne’e.
Igreja Dioseze Baucau kontinua realiza enkontru ho reprezentante Komisaun Organizadora husi munisípiu haat hanesan Lautém, Viquque, Manatuto no Baucau ne’ebé partisipa mós hosi instituisaun seguransa hanesan Polísia Nasionál Timor-Leste (PNTL) ni FALINTIL-Forsa Defeza Timor-Leste (F-FDTL) hodi deskute kona-ba preparativu sira antes dezloka ba Dili.
Dom Leandro, argumenta, rezultadu hosi enkontru iha ona konkordánsia entre munisípiu haat ne’ebé tuir planu sei deskola hamutuk husi kada munisípiu ba fatin destinasaun iha loron-09 fulan-setembru antes partisipa misa iha Tasi-tolu iha loron 10 fulan-setembru.
Hosi númeru ne’ebé rejistu seidauk prenxe tuir tarjetu husi nasionál katak tuir previzaun Diozese Baucau sei prepara sarani hamutuk rihun 200 ne’ebé kada munisípiu sarani rihun-50 maibé ho númeru atuál reprezenta ona entusiazmu sarani Diozese Baucau.
“Ami hein prezensa ita-nia ministériu ne’ebé responsável mai iha kada munisípiu atubele buka dalan tulun no responde liután kona-ba transporte,” Dom Leandro Alves akresenta.
Dioseze Baucau kompostu sarani husi munisípiu haat hanesan; Manatuto, Lautém, Viqueque no Baucau ho totál pároku 22 inklui rezidénsia 24.
Jornalista : Natalino Belo
Editór : Evaristo Soares Martins
