DILI, 16 agostu 2024 (TATOLI)–Sekretariu Estadu Asuntu Toponímia no Organizasaun Urbana (SEATOU), Germano Santa Brites, hateten sei reforsa operasaun ba vendedór sira-ne’ebé kontinua faan iha espasu públiku hanesan iha antigu merkadu Comoro, rotunda Comoro no Fatuhada.
Governante ne’e hateten. ekipa jestaun merkadu Autoridade Munispiu Dili no SEATOU sei organiza tempu ka oráriu serbisu atu reforsa kontrolu iha fatin sira-ne’ebé fó ona avizu maibé vendedór sira kontinua faan.
“Ita haree hela dadaun, ba oin ne’e ita sei muda ekipa jestaun kontrolu merkadu nian orariu atu ita bele servisu orariu ida-ne’ebé diferensa iha tempu lorokraik no kalan, atu ita bele halo serbisu atu nune’e ita bele hatuur ita-nia maluk sira-ne’e tuir lei no regulamentu hodi ita regula ita-nia vendedór sira koopera ho Estadu,” Sekretariu Estadu Asuntu Toponímia no Organizasaun Urbana (SEATOU), Germano Santa Brites, ba jornalista sira iha jardin Largo Lecidere.
Atu sidade ne’e di’ak no moos ba ema hotu, nia dehan, sidadaun sira la’o seguru no karreta motor sira labele halo engarafamentu liuliu iha parte Comoro nian.
Governante esplika, negosiante sira haree ekipa jestaun merkadu, bainhira termina ona oras serbisu nian vendedór sira komesa faan fali ona sasán sira iha espasu públiku sira-ne’ebé proibidu hodi faan.
“Ekipa sira dada aan ona husi terrenu iha tuku 18h00 lorokraik ba leten ona ne’e, entaun ita-nia maluk sira-ne’e kontinua faan iha ne’ebá. Maibé ita la lakon esperansa ba serbisu sira-ne’e tempu iha, ita atu hakaas aan atu hadi’a no regula nafatin. Maske sira faan, ita tuir nafatin atu sira komprende no kumpre nafatin. Se sira lakumpre, problema ne’e sira-nian, ita kontinua halo apreensaun ba sasán ka produtu sira faan,” nia dehan.
Jornalista : Jesuína Xavier
Editór : Cancio Ximenes
