BOBONARO, 19 agostu 2024 (TATOLI) – Ministériu Interior (MI) liuhosi Diresaun Jerál Servisu Migrasaun, segunda sosializa lei númeru 10/2021, loron 16 juñu, alterasaun dahuluk hosi lei númeru 11/2017, loron 24 maiu, kona-ba lei migrasaun no azilu ba autoridade munisípiu autoridade segunransa, entidade relizioju no líder komunitária sira iha munisípiu Bobonaro.
Reprezentante Diretór Jerál Servisu Migrasaun, Paulo Soares Freitas, hateten sosializasaun importante tebes oinsá atu partilla papél no servisu migrasaun nia ba entidade relevante-sira tuir dekretu lei númeru 30/2009, lei orgánika servisu migrasaun nia ne’ebé fó kompeténsia ba servisu migrasaun atu halo kontrolu ba movimentu sidadaun entranjeiru nia liuhosi postu fronteira.
“Ho ida-ne’e servisu migrasaun nafatin partilla papél ne’ebé importante tanba migrasaun mesak sei labele halo buat ida, liuhosi ita-nia liña koordenasaun, ita bele fó hanoin ba malu oinsá ita atu halo kontrolu ba sidadaun estranjeiru ne’ebé mak hela iha ita-nia postu, suku no aldeia,” nia hateten iha salaun Maria-Tapo.
Reprezentante Komandante Operasaun Munisípiu Bobonaro, Inspetór Xefe Sabino Araújo Soares, konsidera liuhosi sosializasaun ne’e membru polísia sira mós bele hatene lala’ok no prosesu ne’ebé servisu migrasaun halo iha munisípiu Bobonaro, liuliu kona-bá vistu no prosesu selu koima.
Sekretáriu Autoridade Munisípiu Bobonaro ba Asuntu Administrasaun Finansa, Domingos da Costa, agradese ba Ministériu Interior no konsidera sosializa ne’e importante tebes tanba munisípiu Bobonaro jeografikamente iha kedas fronteira terrestre ne’ebé baliza ho Nusa Tenggara Timur, Repúblika Indonézia.
“Ita durante ne’e lahatene prosedimentu hotu-hotu, ita gosta buka ema badaen-sira hosi Atambua, Kefa mai hala’o servisu, mas ita lahatene sira mai halo serbisu hamenus ona ita-nia badaen timoroan-sira,” nia katak.
Nia husu ba partisipante sira atu hatutan informasaun ba komunidade sira nune’e bele ajuda servisu migrasaun halo kontrolu ba liña fronteira.
Enkuantu atividade semana kotuk realiza ona iha Rejiaun Autónomo Espesiál Oe-Cuse Ambeno (RAEOA) no sei realiza mós iha munisípiu sira seluk.
Jornalista: Sérgio da Cruz
Editór: Evaristo Soares Martins
