DILI, 19 agostu 2024 (TATOLI)—Deputadu membru komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), Natalino dos Santos, husu Polísia Nasionál Timor-Leste (PNTL) labele tolera grupu ka indivídu balun ne’ebé hakarak perturba orden públika iha ámbitu komemorasaun konsulta populár ba dala-25 no vizita Sua Santidade Amu Papa Francisco iha Timor-Leste.
Tanba, nia dehan, tuir informasaun deskonfia iha grupu no indivídu balun hakarak atu perturba orden públika iha komemorasaun konsulta populár 30 agostu no organiza demostrasaun iha loron Papa Francisco hala’o vizita Estadu no vizita pastorál iha 09-11 setembru 2024.
“Tuir informasaun balun katak iha grupu no ema balun hakarak atu halo perturba orden públika, ne’e polísia iha autoridade foti medida hasoru sira,” bia hateten ba Agência TATOLI, iha Parlamentu Nasionál, sesta (16 agostu 2024) ne’e.
Nia dehan, komemorasaun konsulta populár ne’e loron istóriku tebes hodi determina ka hakotu povu Timor-Leste nia terus durante tinan 24 nia laran, nune’e loron ne’e nu’udar reflesaun ba timoroan hotu atu hakmetek oinsá hanoin hikas ba istória ne’ebé moruk no to’o 30 agostu 1999 hodi hakotu istóriu moruk ne’e.
“Ho situasuan hakmetek hodi komemora ho sentidu Estadu no nu’udar timoroan valoriza loron istóriku ne’e, tanba ema rihun ba rihun mak mate ba rai ida-ne’e,’’ nia hateten
Tanba ne’e, deputadu ne’e nafatin fó fiar ba PNTL no F-FDTL ne’ebé preparadu atu asegura seguransa eventu importante komemorasaun konsulta populár ho Amu Papa Francisco hala’o vizita Estadu no pastorál iha Timor-Leste.
“Vizita Amu Papa ne’e lori dame no hakmatek. Timoroan tenke kontribui ba hakmatek ne’e, nune’e ita bele simu bensaun husi Amu Papa mai Timor-Leste,” nia hateten.
Nia mós husu ba líder komunitáriu sira iha kapitál Dili atu kontrola iha kada suku, karik iha grupu ka ema ruma iha komunidade nia leet hakarak kria instabilidade, informa lalais ba autoridade seguransa hodi bele hola medida.
Jornalista : Nelson de Sousa
Editór : Cancio Ximenes
