PR Horta husu “Hercules” lori investór Indonézia mai investe iha TL
DILI, 19 agostu 2024 (TATOLI) – Prezidente Repúblika, José Ramos Horta, segunda ne’e, iha Palásiu Prezidensiál Dili, hasoru malu ho ekipa Portavóz ba Kandidatura Prezidente Eleitu Indonézia 2024, Prabowo Subianto, Rosario de Marshall ‘Hercules’, hodi husu atu ko’alia ho investór Indonézia atu mai investe iha Timor-Leste.
“Ha’u ho maun Prezidente Ramos-Horta ami la ko’alia buat barak, ami ko’alia de’it kona-ba situasaun Timor-Leste nian, no maun Prezidente husu ha’u bele ko’alia mós ho investór sira iha Indonézia bele mai investe iha Timor-Leste hodi dudu ekonómia Timor-Leste nian,” Hercules hateten ba jornalista sira hafoin ramata enkontru ho Xefe Estadu.
Iha ámbitu hasoru malu entre parte rua la ko’alia kona-ba vizita Prezidente eleitu Indonézia Prabowo Subianto mai Timor-Leste.
“Iha ami nia hasoru malu ne’e la ko’alia buat barak ida, tanba ha’u mai ne’e atu ba vizita familia sira iha Ainaro, ne’e mak ha’u mai ho familia, domingu (25/08) ami fila-fali ba Indonézia ona,” nia hakotu.
Istória Hercules
Hercules, eis-bandidu no “Governante” Tanah Abang nian, fila fali ba ema importante ida iha mundu merkadu nian. Dala ida ne’e, nain ba naran lolos Rosario de Marshall hetan nomeasaun husi PD Pasar Jaya hanesan BUMD ida ne’ebe pertense ba Governu Provinsial DKI, hodi sai peritu.
Hercules la marka prezensa iha mundu bandidu nian ba tempu naruk, atu sai loos hafoin simu suntensa fulan ualu ba kazu kontrolu rai nian iha fulan-marsu 2019.
Hafoin ne’e nia koñesidu katak nia hahú nia fortuna iha mundu negósiu nian. Hercules nia viajen husi moris iha mundu bandidu nian ba sai emprezáriu ida naruk tebes.
Molok hela iha Jakarta, Hercules hela iha Timor Leste. Iha ne’ebá, nia serbisu barak nu’udar traballadór apoiu ba operasaun militár TNI nian.
Hercules dezloka husi Timor-Leste ba Jakarta hodi kura kanek iha nia liman. Iha tempu ne’ebá, Hercules hetan hela tratamentu iha Ospitál Ezérsitu Sentrál Gatot Subroto (RSPAD), Jakarta Sentrál. Liman ne’ebé kanek aparentemente tenke tesi.
Iha eventu Kick Andy 2007, Hercules rekoñese katak nia hetan sona dala 16. Maski nuneʼe, nia seguru nafatin. Metade husi Hercules nia liman-loos, katak husi kotuk-laran tun, uza liman-protétika. La’ós de’it nia liman falsu, nia matan-fukun rua ida mós ema maka baku.
Antes ne’e Hercules hetan tiru iha matan no kilat-musan tama iha nia ulun kotuk, ho asaun sira-ne’e, Hercules hetan apelidu hanesan bandidu ida ne’ebé labele mate.
Reforma hanesan bandidu
Hercules hafoin ne’e husik mundu metan ne’ebé uluk halo nia naran, presizamente hafoin simu sentensa prizaun fulan ualu ba kazu kontrolu rai nian. Hafoin ne’e nia koko atu organiza nia moris hafoin sai hosi prizaun hodi hahú empreendedorizmu ida.
Entre negósiu sira ne’ebé nia hala’o maka negósiu peska iha Muara Baru, Jakarta Norte. Hercules agora muda ona ba di’ak liu no hetan respeitu ba beibeik hosi ema barak.
Hercules nu’udar ema gangster no broker polítiku Indonézia ida husi Timor Lorosa’e. Mane ho naran kompletu Rosario de Marshall moris iha loron 27 Maiu 1968 iha Timor-Leste.
Hercules rasik nu’udar portadór ba TNI-AD durante integrasaun Timor Leste. Bainhira nia muda ba Jakarta, nia harii grupu bandidu ida iha área Tanah Abang no organiza mundu kriminozu Jakarta nian iha dékada 1990.
Iha tempu ne’ebá, Hercules iha nafatin estatutu hanesan gangster prinsipál, dalaruma mosu iha programa TV no revista tabloide sira. Nia mós koñesidu tanba nia relasaun polítika ho kandidatu prezidensiál sira iha tinan 2014 no 2019, maka Prabowo Subianto no ikus Prabowo Subianto realiza duni mehi eleitu ba Prezidente Indonézia iha tinan 2024.
Notísia relevante:FOTO ATUÁL: Hasoru malu entre “Hercules” ho PR Horta iha Palásiu prezidensiál
Jornalista: Hortencio Sanchez
Editór: Florencio Miranda Ximenes
