SEKOMS propoin adisionál rihun $900-resin
DILI, 19 Agostu 2024 (TATOLI) – Sekretaria Estadu Komunikasaun Sosiál (SEKOMS) husu adisionál rihun $900-resin iha reuniaun Komité Revizaun Orsamentu (KRO), tanba tetu ne’ebé simu ho montante millaun $4,6 seidauk sufisiente hodi responde ba planu no programa ne’ebé trasa iha orsamentu 2025 nian.
Sekretáriu Estadu tutela, Expedito Dias Ximenes, relata katak, antes ne’e, SEKOMS propoin millaun $6-resin iha orsamentu tinan oin nian atu implementa planu no programa hitu ne’ebé trasa ona hodi apoia ba mídia sira, maibé tanba envelope fiskál ne’ebé simu ho totál $4,6 ne’e ki’ik liu, entaun presiza submete fali proposta orsamentu adisionál ba KRO hodi hetan apresiasaun.
“Tanba ne’e, ita iha obrigasaun submete fali proposta adisionál ba KRO ho montante rihun $900-resin atu tau iha konsiderasaun”, Sekretáriu Estadu Expedito reitera hafoin remata enkontru ho KRO, iha salaun Ministériu Finansa, Ai-tarak Laran, ohin.
Nia esplika katak husi proposta adisionál rihun $900 ne’ebé SEKOMS aprezenta iha KRO ne’e sei aloka rihun $350-resin ba RTTL atu sosa tan ekipamentu hodi apoiu programa sira, no sei apoia mós ba Sentru Audiovizuál Max Stahl Timor-Leste (CAMSTL) atu halo dijitalizasaun ba produtu hotu ne’ebé mídia sira halo.
Aleinde ne’e, SEKOMS sei kontinua atu hala’o Programa Governu Rona, apoia sentru informasaun iha suku sira, fó formasaun no kapasitasaun ba mídia sira, kontinua Programa Haree, inklui atualiza memorandu entendimentu ne’ebé RTTL no TATOLI halo ona ho ajénsia internasionál sira.
Governante ne’e adianta katak husi proposta ne’ebé SEKOMS aprezenta ona ba KRO ne’e seidauk iha desizaun ruma no espera katak semana ida ne’e bele hetan ona rezultadu, nune’e bele haforsa traballu iha futuru.
Ba 2025 ne’e, SEKOMS nia orsamentu separa ona husi Ministériu Prezidénsia Konsellu Ministru, tanba iha tinan 2023-2024 nia verba ne’e tau hamutuk ho ministériu nian.
Jornalista: Tomé Amado
Editora: Maria Auxiliadora
