DILI, 19 Agostu 2024 (TATOLI) – Ajénsia Notisioza Timor-Leste -Tatoli, I.P, submete proposta adisionál $717.501 ba Komité Revizaun Orsamentu (KRO) 2025 atu hetan apresiasaun, nune’e bele realiza planu no programa ne’ebé planeia ona ba tinan oin.
Prezidente Konsellu Diretivu Tatoli, I.P, Manuel Pinto, informa katak orsamentu Tatoli nian ne’ebé antes ne’e prevee iha Planu Asaun Anuál 2025 ne’e ho montante millaun $2,1, ne’ebé sei implementa programa rua, subprograma tolu no atividade 14 ne’ebé trasa ona, maibé liu husi tetu fiskál ne’ebé ajénsia simu iha de’it $467.055 no sei difikulta planu no programa ne’ebé trasa ona.
“Ohin, Tatoli halo ona nia aprezentasaun ba Orsamentu Jerál Estadu 2025 nian ba iha Komité Revizaun Orsamentu. Ita-nia orsamentu ba 2025 nian prevee millaun $2,1, maibé depois ita simu pakote fiskál husi KRO hetan de’it $467.055. Tan ne’e, ita propoin adisionál $717.501 atu responde ba ita-nia prioridade sira iha tinan oin”, Prezidente Tatoli reitera iha Farol, ohin.
Manuel Pinto salienta katak orsamentu adisionál ne’ebé Tatoli propoin ba KRO ne’e nia rezultadu sei fó sai iha tempu badak depoizde Ministériu Finansa halo tiha ezersísiu balun, tanba proposta ne’ebé Finansa simu ne’e presiza verifika didi’ak, nune’e bele fó resposta tuir duni prioridade ne’ebé instituisaun Estadu sira iha.
Tuir Prezidente Konsellu Diretivu, programa sira ne’ebé Tatoli prepara atu implementa iha 2025 ne’e mak Liberdade Espresaun no Asesu ba Informasaun, ne’ebé akumula atividade lima no Programa Funsionamentu no Dezenvolvimentu Institusionál, ne’ebé kompostu husi atividade ualu.
“Depois ita aprezenta tiha proposta adisionál ne’e, ita la simu resposta direta, maibé liuhusi informasaun ne’ebé Primeiru-Ministru, Kay Rala Xanana Gusmão, hato’o katak parte Ministériu Finansa sei halo konfirmasaun iha tempu besik relasiona ho saida maka Tatoli aprezenta ona”, nia salienta.
Dirijente ne’e adianta katak husi proposta adisionál ne’ebé Tatoli aprezenta ona mak lahetan aprovasaun, nia impaktu ba dezenvolvimentu instituisaun nian iha futuru, tanba Tatoli sei labele kontinua kontrata nia funsionáriu 24, inklui órgaun fiskál úniku.
Aleinde ne’e, Tatoli mós sei labele kontinua nia kooperasaun serbisu ho ajénsia internasionál sira ne’ebé antes ne’e halo ona akordu mak hanesan China Media Group, Antara, Smile Group, inklui labele kontinua programa formasaun no kapasitasaun ba funsionáriu no jornalista sira iha 2025. “Ida ne’e tama iha kategoria bens no servisu nian”, esplika.
Ba kapitál menór, Manuel Pinto realsa katak bainhira verba adisionál ne’ebé Tatoli aprezenta ne’e maka la aprova, ekipamentu sira ne’ebé tau ona iha planu atu sosa hanesan sasán informátika no komunikasaun nian, transporte no jeradór sira sei la akontese, tanba materiál sira ne’ebé daudaun eziste liu ona prazu, balun 2016 no seluk 2019 nian.
Tuir Portál Transparénsia, Tatoli nia orsamentu ba 2024 ho montante $649.526 no ezekuta ona to’o ohin loron 57,7%.
Jornalista: Tomé Amado
Editora: Maria Auxiliadora
