DILI, 19 agostu 2024 (TATOLI) – Ministériu Juventude Desportu Arte no Kultura (MJDAK) no United Nations Population Fund (UNFPA) iha Timor-Leste realiza formasaun kona-ba Relasaun Saudavél ba joven na’in-27 iha salaun Luz Clarita Lecidere Dili.
Formasaun ne’e loke direita husi Ministru Juventude Desportu Arte no Kultura (MJDAK), Nelyo Isaac Sarmento no husu ba joven hirak ne’e atu aproveita formasaun ne’e ho di’ak, nune’e bele fahe fali ba joven seluk ne’ebé la konsege hetan oportunidade hanesan ne’e.
“Agradese ba UNFPA tanba bele iha inisiativa di’ak hodi fó ona formasaun ba joven sira, husu ba joven na’in-27 ne’ebé mak tuir formasaun ne’e tenke aproveita oportunidade ne’e ho di’ak atu nune’e remata formasaun ne’e bele introdús fali ba joven sira ne’ebé mak seidauk hetan formasaun sira hanesan ne’e,” Ministru Nelyo hateten bainhira halo abertura ba formasaun ne’e.
Iha fatin hanesan, Reprezentante UNFPA iha Timor-Leste, Bruce Campdell, hateten, formasaun ida-ne’e marka pasu importante ida ba oin iha esforsu koletívu atu kapasita foin-sa’e sira ho koñesimentu, abilidade, no valór sira ne’ebé sira presiza atu foti desizaun loos no responsavel kona-ba sira-nia saúde no moris-di’ak.
“Orgullu boot maka ha’u hamriik iha ita-boot sira nia oin ohin iha inísiu programa “Formasaun ba Formadór” ba dala-lima ida-ne’e kona-ba Edukasaun Seksualidade Komprensivu (CSE) ou Relasaun Saudavel,” reprejentante UNFPA hateten.
Formsaun ne’e reprezenta UNFPA nia kompromisu atu asegura katak joven ida-idak iha direitu ba informasaun ne’ebé komprensivu, loos, no apropriadu tuir sira nia idade ne’ebé sei fó kbiit ba sira atu foti desizaun sira ne’ebé loos kona-ba sira nia isin, sira nia relasaun, no sira nia futuru.
“Iha UNFPA, ami fiar katak joven sira nia saúde no moris di’ak mak importante liu. Edukasaun Seksualidade Komprensivu la’ós de’it instrumentu ida, ida-ne’e direitu fundamentál ida ne’ebé apoia realizasaun Objetivu sira Dezenvolvimentu Sustentável nian, partikularmente sira ne’ebé relasiona ho saúde, edukasaun, igualdade jéneru, no empoderamentu ba feto no labarik-feto sira,” nia tenik.
Nia dehan tan, “Iha ita-nia mundu ne’ebé avansa lalais, foin-sa’e sira hasoru dezafiu no oportunidade lubuk ida. Husi navega relasaun sira to’o foti desizaun sira kona-ba sira nia saúde, informasaun ne’ebé sira simu-ka falta ida-ne’e-bele fó impaktu maka’as ba sira nia futuru. Tanba ne’e, ita-nia responsabilidade atu asegura katak sira ekipadu ho edukasaun ne’ebé loos, apropriadu ba sira-nia idade, no sensível ba kultura ne’ebé apoia sira-nia dezenvolvimentu no moris-di’ak”.
Tuir nia, Edukasaun Seksualidade Komprensivu la’ós de’it kurrikulu ida, ida-ne’e aprosimasaun olistiku ida ba edukasaun ne’ebé kobre tópiku oioin, inklui dezenvolvimentu umanu, relasaun sira, abilidade pesoál sira, hahalok seksuál, no saúde.
Ida-ne’e enkoraja foin-sa’e sira atu dezenvolve auto-estima (fiar-an) pozitivu no respeitu ba ema seluk enkuantu promove igualdade jéneru no komprende diversidade.
“Liuhusi CSE, ami hakarak atu haburas jerasaun ida ne’ebé la’ós de’it informadu maibé mós empatia, responsavel, no iha kapasidade atu fó kontribuisaun pozitivu ba sosiedade,” nia katak.
Jornalista: Hortencio Sanchez
Editór: Florencio Miranda Ximenes
